غزہ بورڈ آف پیس معاہدے کے اہم نکات سامنے آ گئے

 پاکستان نے عالمی اقتصادی فورم (WEF) 2026 کے موقع پر ڈیووس، سوئٹزرلینڈ میں امریکی صدر ڈونلڈ ٹرمپ کی دعوت پر بورڈ آف پیس میں شمولیت اختیار کی، جس کا مقصد فلسطین میں پائیدار امن قائم کرنا اور غزہ میں انسانی بحران کے خاتمے کے لیے جامع اقدامات کرنا ہے۔

بورڈ آف پیس کے اہم اہداف

بورڈ آف پیس کا بنیادی مقصد غزہ میں مستقل جنگ بندی، انسانی بحران کا خاتمہ اور فلسطین کی منظم تعمیرِ نو ہے، جو اقوام متحدہ کی سلامتی کونسل کی قراردادوں کے مطابق ہوگی۔
تعمیرِ نو کے منصوبے میں شامل اقدامات:

• گھروں، اسپتالوں اور اسکولوں کی بحالی
• پانی اور بجلی کے نظام کی بہتری
• معاشی سرگرمیوں کی فروغ
• فلسطینی عوام کو باعزت زندگی فراہم کرنا

پاکستان اور بین الاقوامی شراکت دار

پاکستان نے اس اقدام میں سعودی عرب، ترکی، مصر، اردن، قطر، متحدہ عرب امارات، انڈونیشیا، بحرین، مراکش، ارجنٹائن، ہنگری اور امریکہ کے ساتھ شمولیت اختیار کی۔ مسلم ممالک کی مؤثر موجودگی اس بات کو یقینی بناتی ہے کہ فلسطینی حقوق، حقِ خود ارادیت اور ریاستی تشخص مرکزی حیثیت میں رہیں۔

پاکستان کا موقف

پاکستان کا موقف بدستور واضح اور غیر متزلزل ہے:

• 1967 سے پہلے کی سرحدوں پر آزاد فلسطینی ریاست
• القدس الشریف اس کا دارالحکومت
• قبضے اور اجتماعی سزا کی سخت مخالفت

فلسطینی قیادت کی جانب سے پاکستان کی تعریف

گذشتہ روز فلسطینی وزیرِاعظم محمد مصطفیٰ نے وزیرِاعظم شہباز شریف کو راستے میں روک کر ان سے مصافحہ کیا اور غزہ میں امن کے لیے پاکستان کی مسلسل حمایت، نسل کشی کے خاتمے کی کوششوں اور فلسطینی عوام کے حق میں مضبوط موقف پر پاکستان کا شکریہ ادا کیا۔

عالمی پذیرائی

بورڈ آف پیس کی دستخطی تقریب کے دوران وزیرِاعظم شہباز شریف اور امریکی صدر کے درمیان خوشگوار تبادلۂ خیال ہوا۔ امریکی صدر نے فیلڈ مارشل سید عاصم منیر کی جانب اشارہ کرتے ہوئے انہیں انگوٹھے کے اشارے سے سراہا، جو پاکستان کی قیادت کی ہم آہنگی اور عالمی سطح پر پذیرائی کا ثبوت ہے۔

فوجی مشن یا اسٹیبلائزیشن فورس میں شمولیت نہیں

بورڈ آف پیس میں شمولیت کا مطلب کسی فوجی مشن یا اسٹیبلائزیشن فورس میں خودکار شمولیت نہیں۔ پاکستان کا مؤقف پہلے سے واضح اور مستقل ہے۔

پاکستان کی عالمی سیاست میں حکمت عملی

پاکستان بلاک بندی سے اجتناب کرتے ہوئے توازن، اصول پسندی اور مؤثر سفارت کاری پر یقین رکھتا ہے۔ فلسطین کے معاملے پر خاموشی اختیار کرنے کے بجائے فعال کردار کو ترجیح دیتا ہے، جس سے عالمی سطح پر اس کی قیادت اور مثبت کردار واضح ہوتا ہے۔