کیا آج بھی کراچی میں بادل برسیں گے؟

محکمہ موسمیات کا کہنا ہے کہ آج ملک کے بالائی علاقوں میں شدید بارش اور برفباری کا امکان ہے، جس کے باعث معمولاتِ زندگی متاثر ہو سکتے ہیں۔ اس دوران سڑکوں پر پھسلن، آمد و رفت میں رکاوٹ اور ٹریفک کی روانی متاثر ہونے کا خدشہ ہے۔

محکمہ موسمیات کے مطابق ناران، کاغان، دیر، سوات، کالام، چترال، کوہستان، مانسہرہ، ایبٹ آباد، شانگلہ، استور، ہنزہ، اسکردو، مری، گلیات، وادی نیلم، باغ، پونچھ، حویلی اور راولاکوٹ میں شدید برفباری متوقع ہے۔ ان علاقوں میں بعض سڑکوں کے بند ہونے اور پھسلن کے باعث سفر مشکل ہو سکتا ہے۔

تیز بارش اور برفباری کے نتیجے میں بالائی خیبر پختونخوا، کشمیر اور گلگت بلتستان کے ندی نالوں میں طغیانی کا خطرہ ہے۔ پہاڑی علاقوں میں لینڈ سلائیڈنگ اور برفانی تودے گرنے کا بھی خدشہ ظاہر کیا گیا ہے۔ سیاحوں کو غیر ضروری سفر سے گریز اور احتیاطی تدابیر اختیار کرنے کی ہدایت کی گئی ہے۔

خیبر پختونخوا، کشمیر، گلگت بلتستان، اسلام آباد اور بالائی و وسطی پنجاب میں تیز ہواؤں اور گرج چمک کے ساتھ بارش کا امکان ہے۔ پہاڑی علاقوں میں برفباری بھی ہو سکتی ہے۔ اسی طرح جنوبی پنجاب، سندھ اور شمالی و شمال مشرقی بلوچستان کے چند علاقوں میں بھی بارش متوقع ہے۔

گزشتہ 24 گھنٹوں کے دوران خیبر پختونخوا، بلوچستان، پنجاب اور سندھ کے مختلف علاقوں میں بارش اور برفباری ریکارڈ کی گئی۔ سب سے زیادہ بارش پاراچنار میں 88 ملی میٹر ہوئی۔ پنجاب میں کرور (لیہ) میں 10، بھکر میں 9 اور ڈی جی خان میں 6 ملی میٹر بارش ریکارڈ کی گئی۔ بلوچستان میں ژوب جبکہ سندھ میں جیکب آباد اور سکھر میں 10 ملی میٹر بارش ہوئی۔ اس دوران پاراچنار، کوئٹہ اور قلات میں دو انچ تک برفباری ریکارڈ کی گئی۔

کم سے کم درجہ حرارت کے حوالے سے محکمہ موسمیات نے بتایا کہ لہہ میں منفی 11، گوپس، اسکردو، بگروٹ اور پاراچنار میں منفی 5، کالام میں منفی 4 اور مالم جبہ میں منفی 3 ڈگری سینٹی گریڈ ریکارڈ کیا گیا۔

محکمہ موسمیات اور دیگر متعلقہ اداروں نے شہریوں اور مسافروں کو ہدایت کی ہے کہ موسم کی صورتحال کے پیش نظر احتیاط کریں، غیر ضروری سفر سے گریز کریں اور جاری الرٹس پر عمل کریں۔