شناختی کارڈ میں عمر کی ترمیم کیلئے فیس کتنی ہے؟ بڑی خبر آگئی

نادرا نے شہریوں کو شناختی کارڈ میں عمر کی درستگی کے حوالے سے سہولت فراہم کر رکھی ہے، تاہم اس کے لیے مخصوص قواعد اور فیس مقرر کی گئی ہے۔

اگر کسی شہری کی عمر شناختی کارڈ میں غلط درج ہو گئی ہو تو وہ درست ثبوت کے ساتھ ترمیم کی درخواست دے سکتا ہے۔ یہ سہولت پاکستان میں موجود افراد کے ساتھ ساتھ بیرونِ ملک مقیم پاکستانیوں کے لیے بھی دستیاب ہے۔

نادرا کے مطابق عمر میں تبدیلی کے لیے درخواست نادرا رجسٹریشن سینٹر یا پاک آئی ڈی موبائل ایپ کے ذریعے دی جا سکتی ہے۔ بیرونِ ملک رہنے والے پاکستانی اپنے قریبی نادرا رجسٹریشن سینٹر یا پاکستانی سفارت خانے سے بھی رجوع کر سکتے ہیں۔ درخواست کے ساتھ تعلیمی اسناد، برتھ سرٹیفکیٹ یا دیگر مستند دستاویزات جمع کروانا ضروری ہوتا ہے۔

نادرا کی جانب سے عمر میں تبدیلی کی فیس درخواست کی نوعیت اور مدت کے مطابق مختلف رکھی گئی ہے۔ پاکستان میں رہنے والے شہری اگر ایک سال تک کی عمر میں ترمیم کروانا چاہیں تو اس کی فیس ایک ہزار روپے ہے۔ اگر تین سال یا اس سے زائد مدت کی تبدیلی درکار ہو تو فیس پانچ ہزار روپے تک ہو سکتی ہے۔

نادرا کے قواعد کے مطابق شناختی کارڈ میں دوسری مرتبہ عمر کی تبدیلی کروانے پر فیس مزید بڑھ جاتی ہے، جو کہ دس ہزار روپے مقرر کی گئی ہے۔ حکام کا کہنا ہے کہ بار بار تبدیلی کی اجازت اس لیے محدود رکھی گئی ہے تاکہ ریکارڈ میں غلط استعمال سے بچا جا سکے۔

شہریوں کو ہدایت کی گئی ہے کہ درخواست دینے سے پہلے تمام ضروری دستاویزات مکمل کریں اور صرف مستند ذرائع سے ہی معلومات حاصل کریں تاکہ کسی مشکل یا تاخیر کا سامنا نہ کرنا پڑے۔