گل پلازہ سانحے کی آڑ میں سیاست اور صوبے کو دو حصوں میں تقسیم نہیں ہونے دیں گے: میئر کراچی

کراچی: میئر کراچی مرتضیٰ وہاب نے ایم کیو ایم کے حالیہ بیان پر ردعمل دیتے ہوئے کہا ہے کہ سانحے کی آڑ میں سیاست اور صوبے کو دو حصوں میں تقسیم کرنے کی اجازت نہیں دی جائے گی۔

مرتضیٰ وہاب نے میڈیا سے گفتگو میں کہا کہ پنجاب میں سڑکیں وفاق تعمیر کرتا ہے، لیکن کراچی میں وفاق تعاون نہیں کر رہا۔ انہوں نے واضح کیا کہ کراچی میں یلو اور ریڈ لائن منصوبہ ابھی تک مکمل نہیں ہوا تو اس کا ذمہ دار وفاق ہے، نہ کہ سندھ حکومت۔ انہوں نے کہا کہ کراچی کے گرین لائن منصوبے میں تاخیر بھی وفاقی سطح کی ناکامی ہے، نہ کہ سندھ کی۔

میئر کراچی نے دوبارہ زور دیا کہ سانحے کی آڑ میں کوئی سیاست نہیں کرے گا اور صوبے کے اتحاد کو کسی بھی صورت دو حصوں میں تقسیم نہیں ہونے دیا جائے گا۔

دوسری جانب، ایم کیو ایم پاکستان کے رہنما سینیٹر فیصل سبزواری نے کہا کہ سیاست ممکنات کا کھیل ہے اور کراچی کو وفاق کے حوالے کرنے کی باتیں ممکن ہیں، لیکن سانحے کے موقع پر کوئی سیاست نہیں ہو رہی۔

یاد رہے کہ ایم کیو ایم پاکستان نے حال ہی میں کراچی کو وفاق کے کنٹرول میں دینے کا مطالبہ کیا تھا، جس پر مرتضیٰ وہاب نے سخت موقف اختیار کیا ہے۔