ہائی بلڈ پریشر پر قابو پانے کا آسان اور قدرتی طریقہ سامنے آگیا

ہائی بلڈ پریشر کو عام طور پر خاموش قاتل کہا جاتا ہے کیونکہ یہ بغیر کسی واضح علامات کے دل، دماغ، گردے اور خون کی نالیوں کو نقصان پہنچا سکتا ہے۔ دنیا بھر میں لاکھوں افراد ہر روز ہائی بلڈ پریشر کی دوائیں استعمال کرتے ہیں۔

ماہرین صحت کا کہنا ہے کہ صرف دوائیوں پر انحصار کافی نہیں بلکہ طرزِ زندگی میں تبدیلی بھی ہائی بلڈ پریشر کو کنٹرول کرنے میں اہم کردار ادا کرتی ہے۔ تحقیقات کے مطابق باقاعدہ ورزش اور وٹامن سی کا استعمال بلڈ پریشر کو مؤثر طریقے سے کم کر سکتا ہے۔

ورزش چاہے ہلکی ہو یا درمیانی شدت کی، خون کی نالیوں کو آرام دیتی ہے، خون کی روانی بہتر کرتی ہے اور ذہنی تناؤ کم کرتی ہے۔ اس کے علاوہ، یہ وزن کو کنٹرول میں رکھنے میں بھی مددگار ہے، جو ہائی بلڈ پریشر کے خطرے کو کم کرنے کے لیے ضروری ہے۔

وٹامن سی ایک طاقتور اینٹی آکسیڈینٹ ہے جو خون کی نالیوں کے اندرونی نقصان کو کم کرتا ہے اور نیٹرک آکسائیڈ کی پیداوار بڑھاتا ہے، جس سے نالیاں کشادہ ہوتی ہیں اور بلڈ پریشر کم ہوتا ہے۔ ماہرین کا کہنا ہے کہ ورزش اور متوازن غذائیت کو روزمرہ زندگی کا حصہ بنانے سے بہتر نتائج حاصل کیے جا سکتے ہیں۔

لہذا، ہائی بلڈ پریشر کے شکار افراد کو چاہیے کہ وہ دوائیوں کے ساتھ ساتھ ورزش اور غذائیت پر بھی توجہ دیں تاکہ اپنے بلڈ پریشر اور مجموعی صحت کو بہتر بنایا جا سکے۔