بارشوں کے حوالے سے محکمہ موسمیات نے بڑی خوشخبری سنادی

محکمہ موسمیات نے ملک کے بالائی علاقوں میں فروری کے آخری دنوں اور مارچ کے ابتدائی ہفتے میں بارشوں کا امکان ظاہر کیا ہے۔

 محکمہ موسمیات کی تازہ رپورٹ کے مطابق پہاڑی علاقوں میں ہلکی سے درمیانی شدت کی بارش متوقع ہے۔ بعض مقامات پر سرد ہوائیں بھی چل سکتی ہیں۔ شہریوں کو سفر کے دوران احتیاط کرنے کا مشورہ دیا گیا ہے۔

رپورٹ میں بتایا گیا ہے کہ سمندری ہواؤں کی بحالی کے بعد کراچی کے اطراف میں نمی بڑھ سکتی ہے۔ اس وجہ سے صبح اور رات کے اوقات میں دھند پڑنے کا امکان ہے۔ تاہم کراچی میں بارش کی پیشگوئی نہیں کی گئی۔ محکمہ موسمیات کے مطابق مارچ کے دوسرے ہفتے میں شہر میں گرمی کی شدت بڑھ سکتی ہے۔ دن کے وقت درجہ حرارت میں اضافہ متوقع ہے۔

لاہور میں آلودگی کی صورتحال بدستور تشویشناک ہے۔ شہر عالمی سطح پر آلودہ شہروں کی فہرست میں دوسرے نمبر پر موجود ہے۔ حالیہ رپورٹ کے مطابق لاہور کا ایئر کوالٹی انڈیکس 219 ریکارڈ کیا گیا ہے۔ ماہرین نے شہریوں کو غیر ضروری باہر نکلنے سے گریز کا مشورہ دیا ہے۔ خاص طور پر بچوں، بزرگوں اور سانس کے مریضوں کو احتیاط برتنے کی ہدایت کی گئی ہے۔

محکمہ موسمیات کا کہنا ہے کہ لاہور میں موسم مجموعی طور پر خشک رہے گا۔ فی الحال بارش کا کوئی امکان نہیں۔ شہر کا مطلع صاف ہے اور ہلکی ہوائیں چل رہی ہیں۔ درجہ حرارت 26 ڈگری سینٹی گریڈ ریکارڈ کیا گیا ہے۔ زیادہ سے زیادہ درجہ حرارت 28 ڈگری تک جا سکتا ہے۔ کم سے کم درجہ حرارت 13 ڈگری رہنے کا امکان ہے۔ ہوا میں نمی کا تناسب 35 فیصد بتایا گیا ہے۔ ہواؤں کی رفتار تقریباً تین کلو میٹر فی گھنٹہ ہے۔