ڈرائیونگ لائسنس بنوانے والوں کیلئے بڑی خوشخبری؛ حکومت کا اہم فیصلہ

خیبرپختونخوا حکومت نے شہریوں کے لیے ڈرائیونگ لائسنس حاصل کرنے کے عمل کو تیز اور آسان بنانے کے لیے ایک اہم قدم اٹھایا ہے۔ اب ایل ٹی وی اور ایچ ٹی وی ٹرانسپورٹ گاڑیوں کے لرنر ڈرائیونگ لائسنس صرف ایک گھنٹے میں جاری کیے جا سکتے ہیں۔

حکام کے مطابق یہ سہولت مکمل طور پر ڈیجیٹل ہے اور درخواست گزار گھر بیٹھے آن لائن درخواست دے سکتے ہیں۔ شہری موبائل ایپ "دستک” کے ذریعے اپنی معلومات درج کریں گے، فیس کی ادائیگی کریں گے اور ڈیجیٹل تصدیق کے بعد لرنر لائسنس حاصل کریں گے۔

خیبرپختونخوا انفارمیشن ٹیکنالوجی بورڈ نے ٹرانسپورٹ ڈائریکٹوریٹ اور ٹرانسپورٹ و ماس ٹرانزٹ محکمہ کے تعاون سے یہ سہولت متعارف کروائی ہے۔ اس اقدام سے نہ صرف شفافیت میں اضافہ ہوگا بلکہ بدعنوانی کے امکانات بھی کم ہوں گے۔

صوبائی حکومت نے کہا ہے کہ مستقبل میں دیگر خدمات بھی اسی طرز پر آن لائن دستیاب کی جائیں گی تاکہ ای گورننس کو فروغ ملے اور شہری کم وقت میں قانونی تقاضے پورے کر سکیں۔ اس اقدام کا مقصد شہریوں کو طویل قطاروں اور غیر ضروری تاخیر سے نجات دلانا ہے۔