نادرا نے قومی شناختی کارڈ میں اہم تبدیلیاں متعارف کروادیں؛ مکمل تفصیلات جانیں

حکومت نے قومی شناختی کارڈ کے سیکیورٹی نظام میں اہم تبدیلیاں نافذ کرنے کا باضابطہ نوٹیفکیشن جاری کر دیا ہے۔

 ان تبدیلیوں کا مقصد شناختی نظام کو زیادہ محفوظ بنانا اور جعل سازی کے امکانات کم کرنا ہے۔ نئے قواعد کے تحت شناختی کارڈ کی تصدیق کے طریقہ کار کو جدید ٹیکنالوجی سے ہم آہنگ کیا گیا ہے تاکہ شہریوں کو بہتر سہولت مل سکے۔

نئے فیصلے کے مطابق فنگر پرنٹس اور آنکھ کی پتلی یعنی آئرس اسکین کو قانونی طور پر شناختی تصدیق کا حصہ بنا دیا گیا ہے۔ اب شہریوں کی شناخت مزید مضبوط بائیومیٹرک نظام کے ذریعے کی جائے گی۔ اس اقدام سے جعلی شناختی کارڈ بنوانے اور غلط استعمال کی حوصلہ شکنی ہو گی۔

حکومت نے شناختی کارڈ پر کیو آر کوڈ کو بھی باقاعدہ سیکیورٹی فیچر کا درجہ دے دیا ہے۔ کیو آر کوڈ کے ذریعے آن لائن اور آف لائن دونوں طریقوں سے فوری تصدیق ممکن ہو گی۔ ادارے اور متعلقہ محکمے چند لمحوں میں کارڈ کی اصلیت جانچ سکیں گے۔ اس سہولت سے سرکاری اور نجی شعبوں میں تصدیقی عمل تیز ہو جائے گا۔

نوٹیفکیشن میں بتایا گیا ہے کہ کیو آر کوڈ اور دیگر تکنیکی فیچرز کو مائیکرو چِپ کے متبادل کے طور پر استعمال کیا جا سکے گا۔ اگر کسی شہری کا شناختی کارڈ معطل کیا گیا تو اس سے منسلک تمام تصدیقی سہولیات بھی فوراً بند کر دی جائیں گی۔ اس طرح غلط استعمال کا راستہ روکا جا سکے گا۔

مزید یہ کہ 60 سال یا اس سے زیادہ عمر کے شہریوں کے لیے عمر بھر کے لیے مؤثر اسمارٹ شناختی کارڈ جاری کرنے کی سہولت بھی فراہم کر دی گئی ہے۔ اس اقدام سے بزرگ شہریوں کو بار بار کارڈ کی تجدید کے جھنجھٹ سے نجات ملے گی۔