بیواؤں اور یتیموں کو حکومت سے کتنے پیسے ملیں گے؟ رحمت کارڈ اسکیم کی مکمل تفصیلات سامنے آگئیں

وزیر اعلیٰ پنجاب مریم نواز شریف نے صوبے بھر میں بیواؤں اور یتیم بچوں کے لیے رحمت کارڈ اسکیم کی باضابطہ منظوری دے دی ہے۔ اس اسکیم کا مقصد معاشرے کے کمزور اور مستحق طبقات کو مالی سہولت فراہم کرنا ہے۔

حکام کے مطابق اس منصوبے کے تحت مستحق بیواؤں کو ایک لاکھ روپے جبکہ یتیم بچوں کو 25 ہزار روپے تک کی مالی امداد دی جائے گی۔ ابتدائی مرحلے میں تقریباً 50 ہزار سے زائد خاندانوں کو اس پروگرام سے فائدہ پہنچنے کی توقع ہے۔

رحمت کارڈ کے لیے درخواستیں مختلف ذرائع سے جمع کروائی جا سکتی ہیں۔ اس میں موبائل ایپ، ویب پورٹل، کال سینٹر اور زکٰوۃ و عشر کے دفاتر شامل ہیں۔ حکام نے بتایا کہ درخواستوں کی تصدیق کے بعد امدادی رقم شفاف انداز میں مستحق افراد تک پہنچائی جائے گی۔

وزیر اعلیٰ پنجاب کا کہنا ہے کہ بیواؤں اور یتیم بچوں کی کفالت ریاست کی ذمہ داری ہے۔ حکومت اس بات کو یقینی بنائے گی کہ امداد واقعی مستحق افراد تک پہنچے۔ اس اسکیم کا مقصد نہ صرف ضرورت مند خاندانوں کو سہارا دینا ہے بلکہ خواتین کو معاشی طور پر خود مختار بنانے میں بھی مدد فراہم کرنا ہے۔