خیبر پختونخوا حکومت کا 12 لاکھ رجسٹرڈ موٹر سائیکل مالکان کیلئے اہم اعلان

خیبرپختونخوا حکومت نے صوبے میں رجسٹرڈ موٹر سائیکل مالکان کے لیے مالی امداد کا اعلان کر دیا ہے۔

 حکومت کے مطابق تقریباً 12 لاکھ موٹر سائیکل رکھنے والے افراد کو فی کس 2200 روپے دیے جائیں گے۔ یہ رقم دو اقساط میں فراہم کی جائے گی تاکہ زیادہ سے زیادہ لوگوں کو فوری ریلیف مل سکے۔

صوبائی حکومت کا کہنا ہے کہ پیٹرولیم مصنوعات کی قیمتوں میں حالیہ اضافے سے عام شہری، خاص طور پر موٹر سائیکل استعمال کرنے والے افراد زیادہ متاثر ہوتے ہیں۔ اسی وجہ سے حکومت نے انہیں کچھ مالی مدد دینے کا فیصلہ کیا ہے۔

میڈیا سے گفتگو کرتے ہوئے وزیر اعلیٰ خیبر پختونخوا سہیل آفریدی نے کہا کہ پیٹرول کی قیمتوں میں اضافہ عوام کے لیے مشکلات پیدا کرتا ہے۔ حکومت کو چاہیے کہ وہ عوام پر بوجھ ڈالنے کے بجائے اپنے اخراجات کم کرے اور سادگی اختیار کرے۔

سہیل آفریدی نے کہا کہ اگر ملک میں پیٹرولیم مصنوعات کی کمی پیدا ہوتی ہے تو اس حوالے سے صوبائی حکومت کے پاس مختلف تجاویز موجود ہیں۔ یہ تجاویز وفاقی حکومت کو بھی ارسال کی جائیں گی تاکہ مسئلے کا حل نکالا جا سکے۔

انہوں نے یہ بھی واضح کیا کہ بی آر ٹی کے کرایوں میں فی الحال کوئی اضافہ نہیں کیا جائے گا۔ مزید یہ کہ خواتین کے لیے 10 نئی پنک بسیں متعارف کرائی جا رہی ہیں تاکہ ان کے سفر کو زیادہ محفوظ اور آسان بنایا جا سکے۔

وزیر اعلیٰ خیبر پختونخوا کا کہنا تھا کہ مستقبل میں پیٹرول کے ساتھ بجلی کی قیمتوں میں بھی اضافہ ہو سکتا ہے۔ اسی لیے حکومت عوام کو متبادل توانائی کی سہولت دینے کے لیے سولر سسٹم فراہم کرنے کے منصوبے پر بھی کام کر رہی ہے۔

سہیل آفریدی کا دعویٰ ہے کہ انہوں نے سرکاری اخراجات کم کرنے کے لیے کئی اقدامات کیے ہیں۔ وزرا اور اعلیٰ حکام کی تنخواہوں میں اضافہ نہیں کیا گیا جبکہ سرکاری خرچ پر بیرون ملک دوروں پر بھی پابندی عائد کر دی گئی ہے۔