عید الفطر 20 مارچ کو ہوگی یا 21 مارچ کو؟ رویتِ ہلال کمیٹی سے اہم خبر آگئی

اسلام آباد میں شوال کے چاند کی رویت کے لیے مرکزی رویت ہلال کمیٹی کا اہم اجلاس 19 مارچ کو طلب کر لیا گیا ہے۔

اجلاس کی صدارت چیئرمین مرکزی رویت ہلال کمیٹی مولانا عبد الخبیر آزاد کریں گے۔ اجلاس میں مختلف مکاتبِ فکر کے علما، محکمہ موسمیات کے نمائندے اور دیگر متعلقہ اداروں کے ماہرین بھی شریک ہوں گے۔

اجلاس کے دوران ملک بھر سے موصول ہونے والی شہادتوں اور اطلاعات کا جائزہ لیا جائے گا۔ اس کے علاوہ مختلف شہروں میں زونل رویت ہلال کمیٹیوں کے اجلاس بھی منعقد ہوں گے۔ یہ کمیٹیاں اپنے اپنے علاقوں میں چاند نظر آنے سے متعلق اطلاعات اکٹھی کریں گی اور اپنی رپورٹ مرکزی کمیٹی کو بھیجیں گی۔

ذرائع کے مطابق زونل کمیٹیوں کی جانب سے ملنے والی شہادتوں کو مرکزی رویت ہلال کمیٹی کے سامنے پیش کیا جائے گا۔ تمام شواہد کا جائزہ لینے کے بعد مرکزی کمیٹی شوال کے چاند کی رویت کے بارے میں حتمی اعلان کرے گی۔ اسی اعلان کے بعد عیدالفطر کی تاریخ کا باضابطہ تعین کیا جائے گا۔

دوسری جانب اسپارکو نے شوال کے چاند کے حوالے سے اپنی پیشگوئی جاری کر دی ہے۔ ادارے کے مطابق نیا چاند 19 مارچ کی صبح 6 بج کر 23 منٹ پر پیدا ہوگا۔ تاہم اس دن غروبِ آفتاب کے وقت چاند کی عمر تقریباً 12 گھنٹے 41 منٹ ہوگی جس کی وجہ سے اس کا نظر آنا مشکل ہو سکتا ہے۔

اسپارکو کے مطابق فلکیاتی اندازوں کے تحت 19 مارچ کی شام چاند نظر آنے کے امکانات کم ہیں۔ اسی وجہ سے اس سال 30 روزے مکمل ہونے کا امکان ظاہر کیا جا رہا ہے۔ اگر ایسا ہوا تو پاکستان میں عیدالفطر 21 مارچ کو منائے جانے کی توقع ہے۔