روزے کتنے ہوں گے اور عید کا چاند کب نظر آئے گا؟ محکمہ موسمیات نے نئی پیشگوئی کردی

محکمہ موسمیات نے عیدالفطر کے چاند کے حوالے سے ابتدائی سائنسی اندازہ جاری کر دیا ہے۔

 ماہرین کے مطابق اس سال رمضان المبارک کے پورے 30 روزے ہونے کا امکان ظاہر کیا جا رہا ہے۔ اگر یہ اندازہ درست ثابت ہوا تو عیدالفطر 21 مارچ کو منائے جانے کی توقع ہے۔ تاہم چاند نظر آنے یا نہ آنے کا حتمی اعلان مرکزی رویت ہلال کمیٹی ہی کرے گی۔

محکمہ موسمیات کے ڈپٹی ڈائریکٹر انجم نذیر کے مطابق مرکزی رویت ہلال کمیٹی کا اجلاس 19 مارچ کو اسلام آباد میں منعقد ہوگا۔ اس اجلاس میں ملک بھر سے آنے والی شہادتوں اور سائنسی معلومات کا جائزہ لیا جائے گا۔ اسی بنیاد پر فیصلہ کیا جائے گا کہ شوال کا چاند نظر آیا ہے یا نہیں۔

انجم نذیر نے کہا کہ سائنسی حساب کے مطابق 19 مارچ کو چاند کی پیدائش پاکستانی وقت کے مطابق صبح 6 بج کر 23 منٹ پر ہوگی۔ اس دن غروب آفتاب کے وقت چاند کی عمر تقریباً 12 گھنٹے کے قریب ہوگی۔ فلکیاتی اصولوں کے مطابق اتنی کم عمر کا چاند عام طور پر نظر نہیں آتا۔

ماہرین کے مطابق چاند کو واضح طور پر دیکھنے کے لیے اس کی عمر عموماً 14 گھنٹے یا اس سے زیادہ ہونا ضروری ہوتی ہے۔ کم عمر چاند نہ صرف عام آنکھ سے دیکھنا مشکل ہوتا ہے بلکہ بعض اوقات دوربین کے ذریعے بھی اس کا مشاہدہ ممکن نہیں ہوتا۔ اسی وجہ سے ماہرین کا خیال ہے کہ 19 مارچ کو چاند نظر آنے کے امکانات بہت کم ہیں۔

محکمہ موسمیات کے حکام کا کہنا ہے کہ اگر 19 مارچ کو چاند نظر نہ آیا تو رمضان المبارک کے 30 روزے مکمل کیے جائیں گے۔ ایسی صورت میں یکم شوال یعنی عیدالفطر 21 مارچ بروز ہفتہ منائے جانے کا امکان ہے۔ تاہم اس بارے میں باضابطہ اعلان مرکزی رویت ہلال کمیٹی ہی کرے گی۔