عید کے چاند سے متعلق چیئرمین مرکزی رویت ہلال کمیٹی نے بڑا اعلان کردیا

اسلام آباد میں شوال کا چاند دیکھنے کے لیے مرکزی رویت ہلال کمیٹی کا اہم اجلاس 19 مارچ کو منعقد ہوگا۔

 اجلاس کی صدارت چیئرمین مرکزی رویت ہلال کمیٹی مولانا عبدالخبیر آزاد کریں گے۔ اجلاس میں ملک بھر سے موصول ہونے والی شہادتوں اور معلومات کا جائزہ لیا جائے گا تاکہ عید الفطر کی تاریخ کا باضابطہ اعلان کیا جا سکے۔

مرکزی اجلاس کے ساتھ ساتھ مختلف بڑے شہروں میں زونل رویت ہلال کمیٹیوں کے اجلاس بھی ہوں گے۔ کراچی، لاہور، پشاور، کوئٹہ اور دیگر شہروں میں مقامی کمیٹیاں چاند دیکھنے کی کوشش کریں گی۔ ان کمیٹیوں کو چاند نظر آنے سے متعلق موصول ہونے والی شہادتیں مرکزی کمیٹی کو ارسال کی جائیں گی۔

چیئرمین رویت ہلال کمیٹی مولانا عبدالخبیر آزاد کا کہنا ہے کہ شوال کے چاند کا اعلان شہادتوں کی بنیاد پر کیا جائے گا۔

دوسری جانب سعودی عرب میں بھی شوال کا چاند دیکھنے کے لیے انتظامات مکمل کر لیے گئے ہیں۔ سعودی عدالتی کونسل کے مطابق 18 مارچ کو اجلاس منعقد ہوگا۔ اس موقع پر ملک بھر میں 29ویں روزے کے بعد چاند دیکھنے کی کوشش کی جائے گی۔ اگر چاند نظر آ گیا تو اگلے دن عید الفطر منائی جائے گی، بصورت دیگر رمضان المبارک کے تیس روزے مکمل کیے جائیں گے۔