شناختی کارڈ بنوانے والوں کی بڑی مشکل آسان ہوگئی

پاکستان میں نادرا نے شہریوں کے لیے قومی شناختی کارڈ کے حصول کو آسان بنانے کے لیے ایک اہم سہولت فراہم کر دی ہے۔ اب وہ شہری جو شناختی کارڈ کے اہل ہیں مگر ان کے پاس کمپیوٹرائزڈ پیدائشی سرٹیفکیٹ موجود نہیں، وہ بھی شناختی کارڈ حاصل کر سکیں گے۔

نادرا کے مطابق تقریباً 98.3 فیصد بالغ افراد کی رجسٹریشن مکمل ہو چکی ہے، لیکن تقریباً 1.7 فیصد افراد ابھی بھی رجسٹریشن کے دائرے میں شامل نہیں ہیں۔ ان میں زیادہ تر خواتین اور ایسے علاقے شامل ہیں جہاں پیدائش کے اندراج کی سہولیات محدود ہیں۔

اس خلا کو دور کرنے کے لیے نادرا نے اب 31 دسمبر 2026 تک ایک خصوصی سہولت متعارف کروائی ہے۔ اس سہولت کے تحت شہری کمپیوٹرائزڈ پیدائشی سرٹیفکیٹ کے بغیر بھی خاندان کے رجسٹرڈ افراد کی بائیومیٹرک تصدیق کے ذریعے قومی شناختی کارڈ حاصل کر سکیں گے۔

یہ اقدام خاص طور پر ان شہریوں کے لیے ہے جو قانونی دستاویزات کی کمی کی وجہ سے شناختی کارڈ کے حصول سے محروم تھے۔ اس سہولت سے لاکھوں شہری اب بلا رکاوٹ اپنی شناختی دستاویز حاصل کر سکیں گے۔