کراچی میں پانی کے منصوبوں سے متعلق بڑی خبر آگئی

وزیر اعلیٰ سندھ مراد علی شاہ نے کراچی میں پانی کے بڑے انفراسٹرکچر منصوبوں پر کام تیز کرنے کی ہدایت دیدی ہے۔

ان منصوبوں میں کے فور واٹر سپلائی پروجیکٹ اور کراچی واٹر اینڈ سیوریج سروسز امپروومنٹ پروجیکٹ (کے ڈبلیو ایس ایس آئی پی) شامل ہیں۔ وزیر اعلیٰ نے کہا کہ یہ اصلاحات شہر کی بڑھتی ہوئی پانی اور نکاسی آب کی ضروریات کو پورا کرنے کے لیے ناگزیر ہیں۔

وزیر اعلیٰ ہاؤس میں اجلاس کے دوران مراد علی شاہ نے کہا کہ کراچی کی بڑھتی ہوئی آبادی کے پیش نظر جدید اور مؤثر پانی کی فراہمی کے نظام کو بہتر بنانا ضروری ہے۔ تمام منصوبوں کو مقررہ وقت اور اعلیٰ معیار کے ساتھ مکمل کیا جائے۔ اجلاس میں صوبائی وزرا، میئر کراچی، چیف سیکریٹری اور مختلف اداروں کے اعلیٰ حکام نے شرکت کی۔

اجلاس میں بتایا گیا کہ کے فور پائپ لائن پر کام تیز کر دیا گیا ہے، خاص طور پر کراچی بی آر ٹی ریڈ لائن پروجیکٹ کے ساتھ 2.7 کلومیٹر طویل مشترکہ کوریڈور پر کام جاری ہے۔ روزانہ دو بڑی پائپ لائنیں بچھانے کا ہدف مقرر کیا گیا ہے۔

وزیر اعلیٰ نے ہدایت دی کہ گنجان آباد علاقوں میں جدید کھدائی تکنیک استعمال کی جائے تاکہ عوامی انفراسٹرکچر کو نقصان نہ پہنچے اور شہری خدمات متاثر نہ ہوں۔

کے ڈبلیو ایس ایس آئی پی کے فیز ون کے متعدد اجزا مکمل ہونے کے قریب ہیں۔ ایک کسٹمر سروس سینٹر مکمل ہو چکا ہے جبکہ دیگر سینٹرز آخری مراحل میں ہیں۔ سی ای آر آر آئی کی عمارت اور سروس گاڑیوں کی پارکنگ شیڈز بھی زیر تعمیر ہیں۔ دھابیجی رائزنگ مین اور دھابیجی پمپنگ اسٹیشن کی بحالی میں بھی نمایاں پیشرفت ہوئی ہے۔

کراچی واٹر اینڈ سیوریج کارپوریشن نے صارفین کے لیے ایک مشترکہ ڈیجیٹل پلیٹ فارم متعارف کروایا ہے، جس کے ذریعے شہری بلوں کی ادائیگی، شکایات کا اندراج اور واٹر ٹینکر کی بکنگ آن لائن کر سکتے ہیں۔ یہ پلیٹ فارم اردو، انگریزی اور سندھی میں دستیاب ہے۔

اجلاس میں کہا گیا کہ کے ڈبلیو ایس ایس آئی پی کے تحت پسماندہ اور غیر رسمی آبادیوں تک پانی اور سیوریج کی سہولیات فراہم کی جا رہی ہیں۔ صوبا نگر اور عیسیٰ نگری جیسے علاقوں کو کمیونٹی پروگرامز کے ذریعے بہتر نظام سے منسلک کیا جا رہا ہے۔ وزیر اعلیٰ نے کہا کہ منصوبے کا بنیادی مقصد ہر شہری کو محفوظ پانی اور مناسب سیوریج فراہم کرنا ہونا چاہیے۔

کے ڈبلیو ایس ایس آئی پی کے فیز ٹو کی تیاریوں کا بھی جائزہ لیا گیا، جس کے تحت پانی کے انفراسٹرکچر اور ادارہ جاتی اصلاحات کو مزید وسعت دی جائے گی۔ آئندہ مرحلہ عالمی بینک اور ایشین انفراسٹرکچر انویسٹمنٹ بینک کے تعاون سے شروع کیا جائے گا۔

وزیر اعلیٰ نے تمام محکموں کو قریبی رابطہ برقرار رکھنے اور منصوبے کی بروقت تکمیل کو یقینی بنانے کی ہدایت دی۔ انہوں نے کہا کہ کے ڈبلیو ایس ایس آئی پی کی کامیابی کراچی کے پانی اور سیوریج کے نظام میں بنیادی تبدیلی لائے گی اور شہریوں کے لیے دیرپا بہتری فراہم کرے گی۔