ایران معاملے پر امریکی فوجیوں کے تحفظات، جنگ مخالف جذبات میں اضافہ، لڑنے سے انکار

ایران کے ساتھ جاری جنگ کے مقاصد اور بڑھتے ہوئے جانی نقصان کی وجہ سے امریکی فوجیوں اور اہلکاروں کے اندر شدید مایوسی اور مخالفت پیدا ہو رہی ہے۔

امریکہ اور ایران کے درمیان جاری جنگ کے دوران امریکی فوج کے اندر سے ہی بغاوت اور بے چینی کی آوازیں اٹھنا شروع ہو گئی ہیں۔

بہت سے امریکی فوجی اہلکار اس جنگ کو بے مقصد قرار دے رہے ہیں اور زمینی حملے کی صورت میں بڑے جانی نقصان سے خوفزدہ ہیں۔

رپورٹ کے مطابق جنگ کے آغاز سے اب تک کم از کم تیرہ امریکی فوجی ہلاک اور دو سو تیس سے زائد زخمی ہو چکے ہیں، جس کی وجہ سے فوجیوں میں یہ احساس پیدا ہو رہا ہے کہ ان کی حفاظت کے انتظامات ناقص ہیں۔

یہ بھی پڑھیں : ایران میں امریکی زمینی فوج بھیجنے کی ضرورت نہیں، لنڈسے گراہم

ایک فوجی اہلکار نے نام ظاہر نہ کرنے کی شرط پر بتایا کہ پینٹاگون کے پاس زمینی حملے کا کوئی واضح منصوبہ نہیں ہے اور یہ ایک بڑی تباہی ثابت ہو سکتا ہے۔

کئی ریزرو اہلکاروں نے سیاسی مقاصد کے لیے استعمال ہونے پر احتجاج کیا ہے اور ان کا کہنا ہے کہ وہ اسرائیل کے لیے اپنی جانیں قربان نہیں کرنا چاہتے۔

اس صورتحال کی وجہ سے امریکی فوج میں ‘ضمیر کی بنیاد پر جنگ سے انکار’ کرنے والوں کی تعداد میں تیزی سے اضافہ ہوا ہے اور بہت سے اہلکار فوج چھوڑنے کے طریقے تلاش کر رہے ہیں۔