مشرق وسطیٰ کشیدگی؛ پاکستان اور چین نے ایران کے معاملے پر اسٹریٹجک تعاون مزید بڑھانے کا اعلان کر دیا

بیجنگ: پاکستان اور چین کے وزرائے خارجہ نے ایران کے معاملے پر اسٹریٹجک تعاون کو مزید مضبوط بنانے پر اتفاق کیا ہے۔ دونوں ممالک نے خطے میں امن قائم رکھنے کے لیے مشترکہ کوششیں جاری رکھنے کا عزم ظاہر کیا۔

چینی وزارت خارجہ کے ترجمان نے کہا کہ پاکستان اور چین ہمیشہ اسٹریٹجک شراکت دار رہے ہیں۔ دونوں ممالک بین الاقوامی اور علاقائی مسائل پر یکساں نقطہ نظر رکھتے ہیں۔

ترجمان کے مطابق دونوں وزرائے خارجہ نے ایران کے معاملے پر قریبی رابطے اور تعاون کو بڑھانے پر زور دیا۔ چین نے یہ بھی کہا کہ خطے میں کشیدگی کم کرنے کے لیے وہ ہمیشہ تعمیری کردار ادا کرتا رہے گا۔

چینی وزارت خارجہ نے تصدیق کی کہ حالیہ کشیدہ صورتحال کے باوجود تین چینی جہاز آبنائے ہرمز سے بحفاظت گزرے۔ اس موقع پر تمام متعلقہ فریقوں کے تعاون پر چین نے شکریہ ادا کیا۔

چین نے جنگ کے دوران تاریخی مقامات کو پہنچنے والے نقصان پر گہرا افسوس بھی ظاہر کیا۔ ساتھ ہی انہوں نے مطالبہ کیا کہ تمام فریق، خاص طور پر امریکا اور اسرائیل، فوری طور پر فوجی کارروائیاں بند کریں اور کشیدگی میں اضافے سے گریز کریں۔

پاکستان اور چین کے درمیان یہ تعاون خطے میں امن اور استحکام کے لیے ایک مثبت قدم سمجھا جا رہا ہے۔