افغان شہری کی ملا ہیبت اللہ پر تنقید اور پاکستانی عسکری قیادت کی حمایت پر بنائی گئی ویڈیو وائرل

افغانستان میں طالبان انتظامیہ اور ملا ہیبت اللہ کی پالیسیوں کے خلاف عوامی بے چینی میں مسلسل اضافہ ہو رہا ہے، جس کا اظہار اب کھلے عام ہونا شروع ہو گیا ہے۔

افغانستان میں طالبان دورِ حکومت اور سپریم لیڈر ملا ہیبت اللہ کی پالیسیوں کے خلاف عوامی سطح پر چلنے والی مہم اب شدت اختیار کرتی جا رہی ہے۔

اس بڑھتی ہوئی مخالفت کے درمیان ایک حیران کن پیش رفت سامنے آئی ہے، جس میں افغان شہریوں کی جانب سے پاکستان اور اس کی عسکری قیادت کے حق میں آوازیں بلند کی جا رہی ہیں۔

مقبوضہ کشمیر کے عوام کی جانب سے پاکستان کی حمایت کے بعد اب افغان شہریوں نے بھی پاکستانی عسکری قیادت پر اپنے بھرپور اعتماد کا اظہار کرنا شروع کر دیا ہے، جو خطے کی سیاست میں ایک بڑی تبدیلی کی علامت سمجھا جا رہا ہے۔

اس سلسلے میں ایک ویڈیو پیغام تیزی سے وائرل ہو رہا ہے، جس میں ایک افغان شہری کو منصوری کور ہیڈ کوارٹر برمل کے مین گیٹ کے بالکل سامنے کھڑے دیکھا جا سکتا ہے۔

یہ بھی پڑھیں : افغان طالبان کی نااہلی، نظامِ صحت تباہ، ادویات کی شدید قلت، طبی عملے کی تنخواہیں بند

یہ افغان شہری انتہائی جرات مندی کے ساتھ ایک پرچی پر درج تحریر کے ذریعے پاکستان اور پاکستان کی عسکری قیادت سے اپنی والہانہ محبت کا اظہار کر رہا ہے۔

ویڈیو میں دیکھا جا سکتا ہے کہ وہ کسی خوف کے بغیر طالبان کے عسکری مرکز کے سامنے کھڑا ہے اور پاکستانی قیادت کے حق میں اپنا پیغام ریکارڈ کروا رہا ہے۔

ویڈیو پیغام میں اس افغان شہری کا کہنا تھا کہ وہ اور ان جیسے بہت سے دیگر افغان شہری اس وقت مکمل طور پر تیار بیٹھے ہیں۔

اس نے انتہائی پر اعتماد لہجے میں پاکستانی عسکری قیادت کو مخاطب کرتے ہوئے کہا کہ ان کے محض ایک اشارے کی دیر ہے، جس کے بعد پوری دنیا ایک تماشا دیکھے گی۔

اس شہری کا یہ اقدام ظاہر کرتا ہے کہ افغانستان کے اندر طالبان رجیم کے خلاف غم و غصہ اس حد تک بڑھ چکا ہے کہ اب لوگ سرحد پار کی قیادت سے امیدیں وابستہ کر رہے ہیں۔

تجزیہ نگاروں کے مطابق یہ صورتحال طالبان انتظامیہ کے لیے ایک بڑا لمحہ فکریہ ہے، کیونکہ ان کے اپنے ہی شہری اب ان کے اقتدار کو چیلنج کر رہے ہیں۔