پاکستان کی امریکہ اور ایران کو اسلام آباد میں مذاکرات کی دعوت

وزیر اعظم نے امریکہ، ایران اور ان کے اتحادیوں کے درمیان لبنان سمیت تمام محاذوں پر فوری جنگ بندی کا اعلان کرتے ہوئے فریقین کو دس اپریل کو اسلام آباد میں مذاکرات کی دعوت دے دی ہے۔

وزیر اعظم شہباز شریف نے انتہائی عاجزی اور مسرت کے ساتھ قوم اور عالمی برادری کو مطلع کیا ہے کہ اسلامی جمہوریہ ایران اور امریکہ اپنے اتحادیوں سمیت لبنان اور دیگر تمام مقامات پر فوری جنگ بندی پر راضی ہو گئے ہیں۔

یہ جنگ بندی فوری طور پر نافذ العمل ہو چکی ہے۔ وزیر اعظم نے دونوں ممالک کی قیادت کے اس دانشمندانہ فیصلے کا خیر مقدم کیا اور ان کا شکریہ ادا کیا۔

یہ بھی پڑھیں : ایران کا بھی جوابی کارروائی روکنے کا اعلان، پاکستان کی مخلصانہ کوششوں پر خراج تحسین

وزیر اعظم نے اعلان کیا ہے کہ وہ دونوں ممالک کے وفود کو جمعہ 10 اپریل 2026 کو اسلام آباد آنے کی دعوت دیتے ہیں۔ ان مذاکرات کا مقصد تمام بقایا تنازعات کے حل کے لیے ایک حتمی اور فیصلہ کن معاہدے تک پہنچنا ہے۔

وزیر اعظم کے مطابق دونوں فریقین نے امن اور استحکام کے مقصد کو آگے بڑھانے کے لیے غیر معمولی فہم و فراست اور تعمیری رویے کا مظاہرہ کیا ہے۔

انہوں نے اس امید کا اظہار کیا کہ اسلام آباد میں ہونے والے یہ مذاکرات خطے میں پائیدار امن کے قیام میں کامیاب ہوں گے۔ وزیر اعظم نے یہ بھی اشارہ دیا کہ آنے والے دنوں میں مزید اچھی خبریں قوم کے ساتھ شیئر کی جائیں گی۔