ایرانی اسپیکر باقر قالیباف میناب اسکول کے شہید بچوں کے بستے بھی اپنے ساتھ لے کر اسلام آباد پہنچے

اسلام آباد: ایران کی پارلیمنٹ کے اسپیکر محمد باقر قالیباف اسلام آباد میں جاری اہم جنگ بندی مذاکرات میں شرکت کے لیے روانہ ہوئے۔ دورانِ پرواز سامنے آنے والی تصاویر نے سفارتی ماحول کو ایک جذباتی رخ دے دیا۔

طیارے کے اندر سے جاری تصاویر میں دیکھا گیا کہ نشستوں پر ایران کے شہر میناب میں ہونے والے اسکول حملے میں جاں بحق بچوں کی تصاویر رکھی گئی تھیں۔ ان کے ساتھ متاثرین کی خون آلود اشیاء بھی موجود تھیں، جو اس سانحے کی شدت کو ظاہر کرتی ہیں۔

میناب کا حملہ رواں سال جنوبی ایران کے ایک پرائمری اسکول پر ہوا تھا، جس میں کم از کم 175 افراد جان سے گئے تھے۔ ہلاک ہونے والوں میں بڑی تعداد بچوں کی تھی، جس نے اس واقعے کو جنگ کے سب سے ہولناک واقعات میں شامل کر دیا۔

محمد باقر قالیباف کا یہ اقدام سفارتی حلقوں میں ایک علامتی پیغام کے طور پر دیکھا جا رہا ہے۔ ان کی کوشش ہے کہ مذاکرات کے دوران اس انسانی سانحے کو مرکزِ گفتگو بنایا جائے اور جنگ بندی کے لیے دباؤ بڑھایا جائے۔

اسلام آباد میں جاری ان مذاکرات میں ایران اور امریکا کے درمیان کشیدگی کم کرنے اور ممکنہ جنگ بندی کے امکانات پر بات چیت کی جا رہی ہے۔