فیلڈ مارشل عاصم منیر کا ایران میں شاہانہ استقبال، تہران نے خصوصی نغمہ جاری کردیا

ایرانی حکومت نے پاکستانی مسلح افواج کے فیلڈ مارشل کی ایرانی سرزمین پر آمد کے موقع پر ایک انتہائی طاقتور اور پرجوش نغمہ جاری کیا ہے۔ یہ نغمہ نہ صرف دونوں ممالک کی عسکری دوستی بلکہ خطے میں ابھرتے ہوئے نئے دفاعی اتحاد کی علامت بن کر سامنے آیا ہے۔

پاکستان اور ایران کے درمیان صدیوں پر محیط برادرانہ تعلقات اب ایک ایسی تزویراتی بلندی پر پہنچ چکے ہیں، جس کی مثال ماضی میں نہیں ملتی۔

پاکستانی مسلح افواج کے فیلڈ مارشل کی ایران آمد کے موقع پر تہران کی جانب سے ایک خصوصی اور ولولہ انگیز نغمہ جاری کیا گیا ہے، جس میں پاکستانی سپہ سالار کو ان کی جرات، بصیرت اور خطے میں امن کے لیے ان کی کوششوں پر شاندار خراج تحسین پیش کیا گیا ہے۔

یہ پہلا موقع ہے کہ ایران نے کسی غیر ملکی عسکری سربراہ کے اعزاز میں اس سطح کا ثقافتی اور عسکری خراجِ عقیدت پیش کیا ہے، جو ایک غیر معمولی سفارتی پیش رفت ہے۔

اس نغمے کے بول اور موسیقی میں دونوں برادر اسلامی ممالک کے درمیان اتحاد، مشترکہ دفاعی مفادات اور ایک دوسرے پر بھرپور اعتماد کی جھلک نمایاں ہے۔

یہ بھی پڑھیں : ٹرمپ کی ناکام حکمتِ عملی نے ایران کو پہلے سے زیادہ متحد اور طاقتور بنا دیا

ایرانی میڈیا اور سرکاری حلقوں کی جانب سے جاری کردہ اس پیغام میں پاکستانی فیلڈ مارشل کو تہران کی سرزمین پر امن کا سفیر اور امتِ مسلمہ کا فخر قرار دیتے ہوئے خوش آمدید کہا گیا ہے۔

یہ نغمہ ایک ایسے وقت میں سامنے آیا ہے جب پاکستان کی میزبانی میں ہونے والے امریکہ اور ایران کے مذاکرات نے عالمی منظرنامے پر پاکستان کی اہمیت کو دو چند کر دیا ہے۔

یہ قدم واشنگٹن اور تل ابیب کے لیے ایک واضح پیغام ہے کہ پاکستان اور ایران اب ایک مضبوط دفاعی حصار میں جڑے ہوئے ہیں۔

یہ نغمہ محض ایک موسیقی کا ٹکڑا نہیں بلکہ ایک طاقتور سیاسی اعلامیہ ہے، جو ثابت کرتا ہے کہ تہران اور اسلام آباد کے درمیان ماضی کی تمام غلط فہمیاں قصہ پارینہ بن چکی ہیں اور اب دونوں ممالک اسٹریٹجک دفاعی شراکت داری کے ایک نئے دور میں داخل ہو چکے ہیں۔

فیلڈ مارشل کا یہ دورہ اور ایران کی جانب سے یہ غیر معمولی والہانہ استقبال اس بات کی تصدیق کرتا ہے کہ مشرق وسطیٰ اور جنوبی ایشیا کے بدلتے ہوئے حالات میں پاکستان کا عسکری ادارہ ایک مرکزی ستون کی حیثیت اختیار کر چکا ہے۔