ٹرینوں میں سفر کرنے والے مسافروں کیلئے بڑی خوشخبری آگئی

وفاقی وزیر ریلوے حنیف عباسی نے کہا ہے کہ دسمبر تک ملک بھر میں تمام ٹرینوں کو عالمی معیار کے مطابق بنا دیا جائے گا۔ ریلوے نظام کو جدید خطوط پر استوار کرنے کے لیے تیزی سے کام جاری ہے۔

وفاقی وزیر ریلوے حنیف عباسی نے میڈیا سے گفتگو کرتے ہوئے کہا کہ سکھر میں چلنے والی بسیں پہلے ہی جدید معیار کے مطابق ہیں۔ تاہم خیبر پختونخوا میں اب بھی بہتری کی ضرورت ہے۔ تمام صوبوں کو کارکردگی میں مقابلہ کرنا چاہیے تاکہ عوام کو بہتر سہولیات مل سکیں۔

انہوں نے کہا کہ کوئٹہ میں جلد “پیپلز ٹرین” کا آغاز کیا جائے گا۔ اس منصوبے کا افتتاح آئندہ دو سے تین ماہ میں متوقع ہے۔ سندھ حکومت کی حوصلہ افزائی کے بغیر یہ منصوبہ ممکن نہیں تھا۔

وزیر ریلوے نے اعلان کیا کہ ستمبر میں کراچی سے روہڑی تک نیا ریلوے ٹریک کھولا جائے گا۔ کفایت شعاری مہم کے باوجود عوامی سہولت کے منصوبے جاری رکھے گئے ہیں۔ کراچی اور لاہور میں ریلوے نظام کو مزید بہتر بنایا جا رہا ہے۔

قبل ازیں ایک اجلاس کی صدارت کرتے ہوئے حنیف عباسی نے ہدایت دی کہ 30 جون تک تمام مقررہ اہداف مکمل کیے جائیں۔ اجلاس میں 25 نئے ہوپر ویگنز کو فوری طور پر سسٹم میں شامل کرنے کا فیصلہ کیا گیا۔

انہوں نے کہا کہ فریٹ آپریشن کو مزید مضبوط اور مؤثر بنایا جائے گا۔ اس کے ساتھ پاور وین کے پرزے فوری طور پر منگوانے اور پرانی کوچز کو فعال کرنے کی ہدایت بھی دی گئی۔

وزیر ریلوے نے کہا کہ تاخیر کا شکار پرزے ایئر کارگو کے ذریعے منگوائے جائیں تاکہ کام میں رکاوٹ نہ آئے۔ 30 جون سے پہلے تمام ریلوے اسٹیشنز پر سولر سسٹم کی تنصیب مکمل کرنے کی ہدایت دی گئی ہے۔

ان کا کہنا تھا کہ ریلوے کو جدید بنانے کے لیے سیف اور اسمارٹ اسٹیشنز بنائے جا رہے ہیں۔ نئے کنٹرول دفاتر بھی قائم کیے جا رہے ہیں۔ اس کے ساتھ ریلوے نظام کو مکمل طور پر ڈیجیٹل بنانے پر کام جاری ہے۔ ٹرینوں کی وقت کی پابندی پر کوئی سمجھوتہ نہیں کیا جائے گا۔ 31 دسمبر تک دو نئی جدتیں بھی متعارف کروائی جائیں گی۔