سرکاری ملازمین کیلئے خوشخبری؛ حکومت کا اہم فیصلہ

وزیراعظم شہباز شریف نے ملک میں الیکٹرک وہیکلز کے فروغ کے لیے جاری اقدامات کو مزید تیز کرنے کی ہدایت دی ہے۔

اس حوالے سے وزیراعظم کی زیر صدارت ایک اہم اجلاس منعقد ہوا، جس میں مختلف وفاقی وزرا اور متعلقہ حکام نے شرکت کی۔ اجلاس کے دوران حکام نے بریفنگ دی کہ ملک میں الیکٹرک گاڑیوں کے استعمال کو بڑھانے کے لیے عملی اقدامات کیے جا رہے ہیں۔

اجلاس میں بتایا گیا کہ اب تک الیکٹرک موٹر سائیکل اور رکشہ بنانے کے لیے 72 سرٹیفکیٹس جاری کیے جا چکے ہیں، جبکہ الیکٹرک گاڑیوں کی تیاری کے لیے بھی 4 مینوفیکچرنگ سرٹیفکیٹس دیے جا چکے ہیں۔

حکام کے مطابق الیکٹرک گاڑیوں کے لیے چارجنگ اسٹیشنز کے قیام میں بھی دلچسپی بڑھ رہی ہے اور اب تک 123 درخواستیں موصول ہو چکی ہیں۔ آئندہ پانچ سال کے دوران ملک میں 30 فیصد گاڑیوں کو بجلی پر منتقل کرنے کی منصوبہ بندی کی جا رہی ہے۔

اجلاس میں یہ بھی بتایا گیا کہ اس منصوبے سے سالانہ اربوں ڈالر کے ایندھن کی بچت ممکن ہو گی۔ اندازہ ہے کہ تقریباً 4.5 بلین ڈالر تک درآمدی ایندھن پر خرچ کم کیا جا سکے گا۔ گریڈ 16 تک کے سرکاری ملازمین کو آسان قسطوں پر الیکٹرک بائیکس ملیں گی۔

وزیراعظم نے اس بات پر بھی زور دیا کہ الیکٹرک موٹر سائیکلوں پر دی جانے والی سبسڈی کے عمل کو شفاف بنایا جائے تاکہ زیادہ سے زیادہ مستحق افراد اس سے فائدہ اٹھا سکیں۔