پاک فوج کی فتح ٹو میزائل سسٹم کی کامیاب مشق، دشمن کو واضح پیغام

پاک فوج کے شعبہ تعلقات عامہ (آئی ایس پی آر) کے مطابق آرمی راکٹ فورس کمانڈ نے مقامی طور پر تیار کردہ فتح ٹو میزائل سسٹم کی کامیاب تربیتی مشق انجام دی ہے۔

آئی ایس پی آر نے بتایا کہ فتح ٹو میزائل جدید ایویونکس اور جدید ترین نیویگیشنل سہولیات سے آراستہ ہے، جو اسے زیادہ درست اور مؤثر بناتے ہیں۔

بیان کے مطابق اس تربیتی لانچ کا مقصد فوجی دستوں کی تربیت، مختلف تکنیکی پہلوؤں کی جانچ اور مختلف ذیلی نظاموں کی کارکردگی کا جائزہ لینا تھا۔

اس مشق کے ذریعے میزائل کی درستگی کو مزید بہتر بنانے اور اس کی بقا کی صلاحیت کو مضبوط کرنے پر بھی توجہ دی گئی۔

میزائل کی اس کامیاب مشق کا مشاہدہ اسٹریٹجک پلانز ڈویژن، آرمی راکٹ فورس کمانڈ اور پاک فوج کے سینئر افسران نے کیا۔

اس موقع پر اسٹریٹجک اداروں کے سائنسدان اور انجینئرز بھی موجود تھے جنہوں نے تکنیکی معاونت فراہم کی۔

فورم نے فتح سیریز کے مقامی طور پر تیار کردہ میزائل کی کامیاب تربیتی مشق کو سراہا اور اس میں شامل تمام افراد کی محنت اور صلاحیتوں کی تعریف کی۔

صدر پاکستان، وزیراعظم، چیف آف ڈیفنس فورسز اور سروسز چیفس نے بھی میزائل کی کامیاب مشق پر متعلقہ ٹیموں کو مبارکباد دی۔

انہوں نے میزائل پروگرام میں شامل سائنسدانوں، انجینئرز اور فوجی ماہرین کی فنی مہارت، لگن اور عزم کو خراج تحسین پیش کیا۔