ڈرائیونگ لائسنس بنوانے کے خواہشمند افراد کیلئے اہم خبر آگئی

ڈرائیونگ لائسنس بنوانے کے عمل کو آسان بناتے ہوئے خیبرپختونخوا حکومت نے صوبے میں ڈیجیٹل لائسنس مینجمنٹ سسٹم متعارف کروا دیا ہے، جس سے شہریوں کو اب پہلے کے مقابلے میں زیادہ سہولت ملے گی۔

وزیراعلیٰ خیبرپختونخوا سہیل آفریدی نے اس نئے نظام کا باضابطہ افتتاح کیا۔ انہوں نے کہا کہ یہ اقدام جدید ٹیکنالوجی کے استعمال کو فروغ دینے کی جانب ایک اہم پیش رفت ہے۔ اس سسٹم کے ذریعے ڈرائیونگ لائسنس کا اجرا مکمل طور پر ڈیجیٹل انداز میں کیا جائے گا۔

اس نئے نظام سے شفافیت اور میرٹ کو یقینی بنانے میں مدد ملے گی۔ شہری اب کئی مراحل آن لائن مکمل کر سکیں گے جس سے وقت اور اخراجات دونوں کی بچت ہوگی۔ اس کے ساتھ ساتھ ای گورننس کے فروغ کے لیے بھی مزید اقدامات کیے جا رہے ہیں۔

بریفنگ کے دوران بتایا گیا کہ پائلٹ پروجیکٹ کے تحت اب تک ہزاروں لرنر اور مستقل ڈرائیونگ لائسنس جاری کیے جا چکے ہیں۔ اس سسٹم میں جدید فیچرز شامل کیے گئے ہیں جن میں اے آئی پر مبنی فیشل ریکگنیشن اور آن لائن میڈیکل سرٹیفکیٹ شامل ہیں۔

مزید بتایا گیا کہ لائسنس کی تصدیق کے لیے کیو آر کوڈ ویری فکیشن سسٹم بھی متعارف کروا دیا گیا ہے جبکہ تمام ریکارڈ کو محفوظ رکھنے کے لیے مرکزی ڈیٹا بیس تیار کیا گیا ہے۔ اس سے جعلسازی کے امکانات کم ہوں گے اور نظام زیادہ قابل اعتماد بنے گا۔

وزیراعلیٰ کا کہنا تھا کہ صوبائی حکومت مستقبل میں مزید آن لائن سروسز اور ڈیجیٹل پیمنٹس کے نظام کو بھی وسعت دے گی تاکہ عوام کو زیادہ سے زیادہ سہولت فراہم کی جا سکے۔