محکمہ خوراک خیبر پختونخوا میں نئی تقرریوں اور تبادلوں پر پابندی عائد

خیبر پختونخوا کے محکمہ خوراک نے اہم انتظامی فیصلہ کرتے ہوئے محکمے میں نئی تقرریوں اور تبادلوں پر فوری پابندی عائد کر دی ہے۔ یہ اقدام صوبے میں گندم کی خریداری مہم 2026 کو مؤثر اور شفاف بنانے کے لیے کیا گیا ہے۔

حکام کے مطابق یہ پابندی فوری طور پر نافذ العمل ہوگی اور گندم خریداری مہم کے دوران تمام افسران اور اہلکار اپنی موجودہ تعیناتی پر ہی فرائض انجام دیں گے۔ اس دوران کسی بھی قسم کا تبادلہ یا نئی پوسٹنگ نہیں کی جائے گی۔

سیکریٹری خوراک خیبر پختونخوا کی جانب سے جاری حکم نامے میں واضح کیا گیا ہے کہ یہ فیصلہ گندم کی خریداری کے اہداف حاصل کرنے اور نظام میں شفافیت برقرار رکھنے کے لیے کیا گیا ہے۔

اعلامیے کے مطابق صرف انتہائی ضروری انتظامی وجوہات، انضباطی کارروائی یا عوامی مفاد کی صورت میں تبادلے کی اجازت دی جا سکے گی۔ تاہم اس کے لیے بھی سیکریٹری فوڈ کی پیشگی منظوری لازمی ہوگی۔

محکمے نے تمام ڈویژنل ڈپٹی ڈائریکٹرز اور ڈسٹرکٹ فوڈ کنٹرولرز کو ہدایت کی ہے کہ وہ ان احکامات پر سختی سے عمل کریں۔ کسی بھی خلاف ورزی کی صورت میں متعلقہ قوانین کے تحت کارروائی کی جائے گی۔