پنجاب حکومت نے’’مریم کو بتائیں‘‘ پروگرام کی مد میں شہریوں کو ایک ارب روپے تک کیش دینے کی منظوری دیدی

پنجاب حکومت نے’’مریم کو بتائیں‘‘ پروگرام کی مد میں ایک ارب روپے تک شہریوں کو کیش دینے کی منظوری دیدی ہے۔

تفصیلات کے مطابق پنجاب حکومت کی جانب سے ’’مریم کو بتائیں‘‘ پروگرام کے لیے ایک ارب روپے تک کی رقم مختص کی گئی ہے۔ اس فنڈ کے ذریعے اہل شہریوں کو 10 ہزار روپے تک کیش امداد فراہم کی جائے گی۔ حکومت نے اس منصوبے کو جاری رکھنے کی منظوری بھی دے دی ہے۔

ذرائع کے مطابق اس پروگرام کے اہلیت کے معیار اور مالیاتی ڈھانچے میں بھی کچھ تبدیلیاں کی گئی ہیں۔ ان تبدیلیوں کا مقصد نظام کو زیادہ شفاف اور مؤثر بنانا ہے۔ منصوبہ بندی اور ترقیاتی بورڈ نے اس ایجنڈے کی منظوری سرکولیشن کے ذریعے دی ہے۔

حکام کا کہنا ہے کہ یہ پروگرام اس وقت تک جاری رہے گا جب تک مختص کردہ ایک ارب روپے مکمل طور پر تقسیم نہیں ہو جاتے۔ اس دوران درخواستوں اور شکایات کے عمل کو مزید بہتر بنانے پر بھی کام کیا جائے گا۔

شہری اس پروگرام سے فائدہ اٹھانے کے لیے ’’مریم کو بتائیں‘‘ موبائل ایپ اور ہیلپ لائن کا استعمال کر سکیں گے۔ ان ذرائع کے ذریعے شکایات درج کروائی جا سکتی ہیں اور مالی امداد کے لیے درخواست بھی دی جا سکتی ہے۔