پاکستان کو عالمی مالیاتی ادارے سے ایک ارب تیس کروڑ ڈالر کی قسط موصول

پاکستان کو عالمی مالیاتی ادارے کی جانب سے ایک ارب تیس کروڑ ڈالر کی بھاری رقم موصول ہوگئی ہے، جس سے ملک کے زرمبادلہ کے ذخائر میں نمایاں بہتری آنے کی توقع ہے۔

اسٹیٹ بینک آف پاکستان نے تصدیق کی ہے کہ اسے عالمی مالیاتی فنڈ کے توسیعی فنڈ سہولت اور لچک و پائیداری کی سہولت کے پروگراموں کے تحت تقریباً ایک ارب تیس کروڑ امریکی ڈالر موصول ہو گئے ہیں۔

عالمی مالیاتی ادارے کے ایگزیکٹو بورڈ نے 8 مئی 2026 کو منعقدہ اجلاس میں توسیعی فنڈ سہولت کے تیسرے جائزے کی تکمیل کے بعد پاکستان کے لیے سات سو ساٹھ ملین ایس ڈی آر کی منظوری دی تھی۔

یہ بھی پڑھیں : ایران امریکہ ثالثی سبوتاژ کرنے کیلئے پاکستان مخالف بھارتی و افغان پروپیگنڈا بے نقاب

اس کے علاوہ، ادارے نے لچک اور پائیداری کی سہولت کے تحت ایک سو چون ملین ایس ڈی آر کی دوسری قسط بھی جاری کرنے کی ہامی بھری تھی۔

مرکزی بینک کے مطابق، 12 مئی 2026 کو نو سو چودہ ملین ایس ڈی آر، جو کہ تقریباً ایک ارب تیس کروڑ ڈالر کے مساوی ہیں، موصول ہو چکے ہیں۔

یہ رقم 15 مئی 2026 کو ختم ہونے والے ہفتے کے دوران اسٹیٹ بینک کے غیر ملکی زرِ مبادلہ کے ذخائر کا حصہ بن جائے گی۔ اس بڑی رقم کی وصولی سے ملکی معیشت پر مثبت اثرات مرتب ہوں گے اور روپے کی قدر کو استحکام ملے گا۔