امریکہ کی جانب سے ایران کی بحری ناکہ بندی اور لڑاکا طیاروں کے گشت میں اضافہ

امریکہ نے ایران کے خلاف جاری بحری ناکہ بندی کو مزید سخت کرتے ہوئے آبنائے ہرمز میں اسٹیلتھ لڑاکا طیاروں کا گشت شروع کر دیا ہے۔

امریکی سینٹرل کمانڈ نے مشرق وسطیٰ کی کشیدہ صورتحال کے تناظر میں ایرانی بندرگاہوں کی مکمل بحری ناکہ بندی جاری رکھنے کا باقاعدہ اعلان کیا ہے۔

واشنگٹن کی جانب سے جاری بیان میں کہا گیا کہ امریکی افواج ایرانی حدود کی طرف جانے والے یا وہاں سے روانہ ہونے والے تمام تجارتی بحری جہازوں کی سخت نگرانی کر رہی ہیں۔

گزشتہ چار ہفتوں کے دوران امریکی بحریہ نے ناکہ بندی کی ہدایات پر عمل درآمد کرواتے ہوئے مجموعی طور پر سرسٹھ تجارتی جہازوں کو اپنا راستہ تبدیل کرنے پر مجبور کیا۔

اس دوران صرف پندرہ ایسے بحری جہازوں کو گزرنے کی اجازت دی گئی جو انسانی ہمدردی کی بنیاد پر امدادی سامان لے کر جا رہے تھے۔

حکام کا کہنا ہے کہ چار بحری جہازوں کو مکمل طور پر روک لیا گیا کیونکہ انہوں نے ناکہ بندی کے قواعد و ضوابط کی خلاف ورزی کی تھی۔

یہ بھی پڑھیں : ایران برسوں تک آبنائے ہرمز بند رکھنے کی صلاحیت رکھتا ہے، امریکی سینیٹرز

علاقائی پانیوں میں تناؤ اس وقت مزید بڑھ گیا، جب امریکی افواج نے وائرلیس کے ذریعے انتباہ اور چھوٹے ہتھیاروں سے انتباہی فائرنگ کر کے دو مزید تجارتی جہازوں کا رخ موڑ دیا۔

اس بحری ناکہ بندی کے ساتھ ساتھ امریکی فضائیہ کا جدید ترین ایف پینتیس اے اسٹیلتھ لڑاکا طیارہ بھی آبنائے ہرمز کے اوپر مسلسل گشت کر رہا ہے۔

یہ جدید طیارہ اٹھارہ ہزار پاؤنڈ تک گولہ بارود لے جانے کی صلاحیت رکھتا ہے اور آواز کی رفتار سے تیز پرواز کرتے ہوئے کسی بھی ہدف کو نشانہ بنا سکتا ہے۔

ایران اور امریکہ و اسرائیل کے درمیان چھڑنے والی اس جنگ کے بعد سے واشنگٹن نے خطے میں بیس کے قریب جنگی بحری جہاز تعینات کر رکھے ہیں، جو ہزاروں فوجیوں اور جدید ترین عسکری ساز و سامان سے لیس ہیں۔ تیرہ اپریل سے نافذ العمل اس ناکہ بندی نے ایرانی تجارت کو شدید متاثر کیا ہے۔

دوسری جانب امریکی وزیر دفاع پیٹ ہیگستھ نے واشنگٹن میں صحافیوں سے گفتگو کرتے ہوئے واضح کیا ہے کہ پینٹاگون کے پاس ایران کے خلاف عسکری کارروائیوں میں مزید شدت لانے کے تمام منصوبے تیار ہیں اور ضرورت پڑنے پر ان پر عمل درآمد کیا جائے گا۔