امریکی حکومت کے حساس ترین رازوں پر کروڑوں ڈالرز کے جوئے کا انکشاف

واشنگٹن میں حساس سرکاری معلومات، سیاسی فیصلوں اور خفیہ فوجی کارروائیوں کو کروڑوں ڈالرز کے جوئے اور شرطوں میں تبدیل کیا جا رہا ہے، جس سے ملکی سلامتی کو شدید خطرات لاحق ہو گئے ہیں۔

امریکی مالیاتی ریگولیٹرز اور قانون نافذ کرنے والے اداروں نے پیش گوئی کرنے والی ڈیجیٹل مارکیٹس کی نگرانی اور اسکرٹنی میں غیر معمولی اضافہ کر دیا ہے۔

ماضی میں اندرونی معلومات کے غیر قانونی استعمال یعنی انسائیڈر ٹریڈنگ کے مقدمات صرف وال اسٹریٹ کے تجارتی مراکز اور کارپوریٹ بورڈ رومز تک محدود ہوا کرتے تھے، لیکن اب یہ رجحان ڈیجیٹل دنیا میں پھیل چکا ہے۔

کالشی اور پولی مارکیٹ جیسے بڑے آن لائن پلیٹ فارمز صارفین کو حقیقی دنیا کے سیاسی اور جغرافیائی سیاسی نتائج پر بھاری شرطیں لگانے کی اجازت دے رہے ہیں۔

حکام کا کہنا ہے کہ واشنگٹن کے غیر مستحکم سیاسی ماحول اور ان مارکیٹس کی تیز رفتار ترقی نے ان افراد کے لیے نئے مواقع پیدا کر دیئے ہیں، جن کی رسائی غیر عوامی اور انتہائی حساس سرکاری معلومات تک ہے۔ یہ لوگ ان اہم واقعات کے پبلک ہونے سے پہلے ہی شرطیں لگا کر کروڑوں روپے کا منافع کما رہے ہیں۔

سب سے بڑا قانونی مسئلہ یہ ہے کہ انسائیڈر ٹریڈنگ کے موجودہ قوانین سیکیورٹیز اور اسٹاک مارکیٹ کے لیے بنائے گئے تھے، ان کا اطلاق قانون سازی، انتخابات یا عسکری سرگرمیوں سے جڑے پیش گوئی کے معاہدوں پر نہیں ہوتا، جس کی وجہ سے ایک بڑا قانونی خلا پیدا ہو چکا ہے۔

یہ بھی پڑھیں : ایران پر فیصلہ کن حملہ پاکستان کی درخواست پر روکا، امریکی صدر

حالیہ مہینوں میں کموڈٹی فیوچرز ٹریڈنگ کمیشن اور مین ہٹن کے امریکی اٹارنی آفس نے کالشی اور پولی مارکیٹ کو متعدد نوٹس اور درخواستیں بھیجی ہیں۔

ان تحقیقات کا محور وہ تجارتی شرطیں ہیں، جو سیاسی پیش رفت اور ایران اور وینزویلا سمیت انتہائی حساس عالمی واقعات سے منسلک ہیں۔

یہ معاملہ اس وقت انتہائی سنگین اور فوری توجہ کا حامل بن گیا، جب امریکی فوج کے ایک اسپیشل فورسز کے اہلکار کو گرفتار کیا گیا۔

اس اہلکار نے وینزویلا کے صدر نکولس مادورو کے اغوا سے متعلق ایک انتہائی خفیہ اور کورٹ فوجی آپریشن پر شرط لگا کر چار لاکھ ڈالر سے زائد کی رقم کمائی تھی۔

ریگولیٹرز کا کہنا ہے کہ آنے والے دنوں میں اس سلسلے میں مزید بڑی قانونی کارروائیاں متوقع ہیں۔ کالشی اور پولی مارکیٹ اس شعبے کے دو سب سے بڑے پلیٹ فارم بن چکے ہیں، تاہم ان کی نگرانی کا نظام روایتی مالیاتی اداروں جتنا مضبوط نہیں ہے۔

کالشی انتظامیہ کا دعویٰ ہے کہ انہوں نے اب تک دو سو سے زائد اندرونی تحقیقات کی ہیں اور کئی معاملات قانون نافذ کرنے والے اداروں کو بھیجے ہیں، جن میں فوجی خاندانوں کی جانب سے حساس معلومات پر کی جانے والی مشکوک تجارت بھی شامل ہے۔

پولی مارکیٹ جو کہ سمندر پار کام کرتی ہے لیکن امریکی صارفین اس تک بڑے پیمانے پر رسائی رکھتے ہیں، کا کہنا ہے کہ وہ بلاک چین نیٹ ورک کے ذریعے مشکوک پیٹرن کی نگرانی کر رہے ہیں اور سو کے قریب ڈیجیٹل والیٹس حکام کے حوالے کیے جا چکے ہیں، تاہم ناقدین اب بھی ان پلیٹ فارمز پر سخت تحفظات کا اظہار کر رہے ہیں۔