پاکستان میں تین ماہ کے دوران 10 ہزار سے زائد نئی کمپنیوں کی ریکارڈ رجسٹریشن مکمل

ایس ای سی پی کے تحت فروری سے اپریل 2026 کے دوران ریکارڈ 10 ہزار 511 نئی کمپنیوں کی رجسٹریشن مکمل ہوئی ہے، جو کاروباری اعتماد اور ملکی معیشت کی پائیدار ترقی کی واضح عکاسی کرتی ہے۔

پاکستان میں کاروباری ماحول میں نمایاں اور ریکارڈ بہتری کے باعث ملک کے اندر سرمایہ کاری اور نئی کمپنیوں کی رجسٹریشن میں انتہائی مثبت پیش رفت ریکارڈ کی گئی ہے، جو ملکی معیشت کے لیے ایک خوش آئند علامت ہے۔

سیکیورٹیز اینڈ ایکسچینج کمیشن آف پاکستان کی ایگزیکٹو ڈائریکٹر مسرت جبین نے تفصیلات بتاتے ہوئے کہا ہے کہ ان کا ادارہ ملک میں سرمایہ کاری کے عمل کو مزید آسان، تیز رفتار بنانے اور پاکستان کے مالیاتی نظام کو جدید ترین عالمی خطوط پر استوار کرنے کے لیے انتہائی اہم اور انقلابی اصلاحات متعارف کروا رہا ہے۔

انہوں نے بتایا کہ ایس ای سی پی کے تحت فروری سے لے کر اپریل 2026 کے محض تین مہینوں کے دوران ریکارڈ 10 ہزار 511 نئی کمپنیوں کی رجسٹریشن کا عمل کامیابی سے مکمل کیا گیا ہے۔

ان کا کہنا تھا کہ یہ غیر معمولی اضافہ گزشتہ سال کے اسی عرصے کے مقابلے میں 21 فیصد زیادہ ہے، جو کہ ملکی اور بین الاقوامی سرمایہ کاروں کے کاروباری اعتماد میں ہونے والی زبردست بہتری کو واضح طور پر ظاہر کرتا ہے۔

یہ بھی پڑھیں : ایس ای سی پی کا نیا ریکارڈ، پاکستان میں ایک ماہ کے دوران 4 ہزار سے زائد کمپنیاں رجسٹرڈ

مسرت جبین کے مطابق پاکستان کی تاریخ میں پہلی مرتبہ ایسا ہوا ہے کہ محض ایک مہینے کے قلیل عرصے کے اندر 4 ہزار 82 نئی کمپنیوں کی ریکارڈ رجسٹریشن مکمل کی گئی ہو۔

اس کاروباری تیزی میں سب سے اہم پہلو یہ ہے کہ دنیا کے 22 سے زائد مختلف ممالک کے غیر ملکی سرمایہ کاروں نے پاکستان کے مختلف شعبوں میں گہری دلچسپی لیتے ہوئے نئی کمپنیاں قائم کی ہیں، جس سے براہِ راست بیرونی سرمایہ کاری میں بڑا اضافہ ہوا ہے۔

ان 22 ممالک کی 220 غیر ملکی شیئر ہولڈنگ کمپنیوں کا ادا شدہ سرمایہ اب بڑھ کر 88 کروڑ 20 لاکھ (882 ملین) روپے تک پہنچ گیا ہے، جو گزشتہ سال کی نسبت 218 فیصد زائد بنتا ہے۔

معاشی بہتری کے اس تسلسل پر گفتگو کرتے ہوئے پاکستان اسٹاک ایکسچینج کے چیف ایگزیکٹو آفیسر فرخ سبزواری نے کہا کہ ایس ای سی پی کی بہترین نگرانی کی بدولت کمپنیوں کی اسٹاک مارکیٹ میں لسٹنگ کی پائیدار لائن انتہائی مضبوط ہے اور اگلے بارہ مہینوں کے دوران مارکیٹ میں 10 سے 12 نئے انیشل پبلک آفرنگز یعنی کمپنیوں کے حصص کی عوامی فروخت متوقع ہے۔

اس کے ساتھ ہی سینٹرل ڈیپازٹری سسٹم کے چیف ایگزیکٹو آفیسر بدیع الدین اکبر نے بھی پاکستانی معیشت کی تعریف کرتے ہوئے کہا کہ پاکستان کی کیپٹل مارکیٹ اس وقت پورے ایشیا اور دنیا کی بہترین پرفارم کرنے والی مارکیٹس میں سے ایک بن چکی ہے۔

انہوں نے امید ظاہر کی کہ اگلے دو سے تین سال کے اندر مارکیٹ میں 25 لاکھ نئے سرمایہ کاروں کو لانے کا ہدف مکمل طور پر قابلِ حصول ہے۔