بحیرہ کیسپین راہداری: ایران اور روس کا امریکی پابندیوں کو بائی پاس کرنے کا ماسٹر پلان

ایران اور روس امریکی و مغربی پابندیوں کو ناکام بنانے کے لیے بحیرہ کیسپین کے تجارتی راستے کو ایک اسٹریٹجک متبادل کے طور پر تیزی سے فروغ دے رہے ہیں۔

ایران اور روس نے امریکی اور مغربی اقتصادی پابندیوں کو مکمل طور پر بائی پاس کرنے اور ملکی معیشت کو سہارا دینے کے لیے بحیرہ کیسپین کے روٹ کو ایک انتہائی اہم اور محفوظ تجارتی نیٹ ورک کے طور پر استعمال کرنا شروع کر دیا ہے۔

یہ تجارتی راہداری کسی بھی بیرونی اور دشمن زمینی راستے پر انحصار کیے بغیر دونوں ممالک کو ایک دوسرے سے براہِ راست جوڑتی ہے۔

اس اسٹریٹجک نیٹ ورک کی قانونی مضبوطی سال 2018 کے بحیرہ کیسپین معاہدے سے ملتی ہے، جس کے تحت کسی بھی غیر علاقائی ملک کی فوج یا مسلح بحری جہازوں کو اس سمندر میں داخل ہونے کی اجازت نہیں ہے، اور یہی شق اس وقت تہران اور ماسکو کے لیے سب سے بڑی حفاظتی ڈھال بن چکی ہے۔

اس سفارتی اور تجارتی اشتراک کا تجزیہ کیا جائے تو سال 2022 میں 21 سال کے طویل عرصے کے بعد روس کا پہلا مال بردار بحری جہاز ایران کی نوشہر بندرگاہ پر پہنچا تھا، جس کے بعد دونوں ممالک کی شپنگ کمپنیوں نے مل کر بین الاقوامی شمال جنوب ٹرانسپورٹ راہداری کو تیزی سے ترقی دی۔

یہ بھی پڑھیں : آرکٹک کی معاشی دوڑ میں مغرب کو شکست، روس نے منفی 60 ڈگری پر کام کرنے والی ٹیکنالوجی بنا لی

سال 2025 تک ایران کی بندر انزلی پر کارگو جہازوں کی آمد و رفت میں 56 فیصد کا ریکارڈ اضافہ دیکھا گیا۔ امریکہ اور اسرائیل کی جانب سے ایران کے خلاف حالیہ جنگ کے دوران جب خلیج فارس کی ناکہ بندی کی گئی اور زمینی راستے خطرناک ہو گئے، تو بحیرہ کیسپین کا یہ روٹ ایران کی بقا کے لیے سب سے اہم لائف لائن بن کر سامنے آیا۔

اس بار روس نے اسی راستے کا استعمال کرتے ہوئے ایران کو دفاعی ہتھیار، جنگی ساز و سامان اور اس کے ساتھ ساتھ ایرانی عوام کے لیے غذائی اجناس اور بنیادی ضرورت کا سامان کامیابی سے منتقل کیا تاکہ وہ معاشی ناکہ بندی کا مقابلہ کر سکیں۔

جاری صورتحال میں ایک بڑا موڑ اس وقت آیا، جب مارچ 2026 میں اسرائیل کی جانب سے بندر انزلی پر میزائل حملے کیے گئے، جس پر روس نے انتہائی سخت اور جارحانہ ردِعمل کا اظہار کیا۔

ماسکو نے اسرائیل کو صاف الفاظ میں خبردار کیا کہ یہ حملے براہِ راست روس کے معاشی مفادات پر اثر انداز ہو رہے ہیں اور اس قسم کی کارروائیوں سے بحیرہ کیسپین کی دیگر پرامن ریاستیں بھی اس عسکری تنازع کی لپیٹ میں آ سکتی ہیں۔

تجزیہ نگاروں کے مطابق موجودہ جنگ ختم ہونے کے بعد بھی بحیرہ کیسپین کی اہمیت کم نہیں ہوگی کیونکہ روس اس شمال جنوب راہداری کو یورپ کا متبادل بنا کر براہِ راست بھارت تک تجارتی رسائی حاصل کرنے کے لیے استعمال کرنا چاہتا ہے، جس سے نیٹو اور مغربی ممالک کا تجارتی تسلط ہمیشہ کے لیے ختم ہو جائے گا۔