یورپی یونین نے فلسطینیوں کو زبردستی بے دخل کرنے والی اسرائیلی تنظیموں پر پابندیاں لگادیں

یورپی یونین نے مقبوضہ مغربی کنارے میں فلسطینیوں کے خلاف انسانی حقوق کی سنگین اور منظم خلاف ورزیوں میں ملوث ہونے پر 4 اسرائیلی آباد کار تنظیموں اور تین افراد پر سخت پابندیاں عائد کر دی ہیں۔

یورپی یونین نے مقبوضہ مغربی کنارے میں عام فلسطینی شہریوں کے خلاف انسانی حقوق کی باقاعدہ اور منظم خلاف ورزیوں کے الزامات کے تحت 4 اسرائیلی آباد کار تنظیموں اور تین افراد پر باضابطہ طور پر پابندیاں عائد کرنے کا فیصلہ کیا ہے۔

یہ کارروائی یورپی یونین کے عالمی انسانی حقوق کے پابندیوں کے نظام کے تحت کی گئی ہے، جس کا مقصد ان انتہا پسند آباد کاروں اور گروپوں کو نشانہ بنانا ہے، جو فلسطینی علاقوں میں تشدد پھیلانے، لوگوں کو زبردستی گھروں سے نکالنے اور غیر قانونی بستیوں کو پھیلانے میں ملوث ہیں۔

یہ فیصلہ یورپی یونین کے وزرائے خارجہ کے درمیان گیارہ مئی کو ہونے والے سیاسی معاہدے کے بعد سامنے آیا ہے، جس پر پہلے ہنگری کے سابق وزیر اعظم وکٹر اوربان کی مخالفت کی وجہ سے تاخیر ہو رہی تھی، لیکن ان کے عہدے سے ہٹنے کے بعد ہنگری کا ویٹو ختم ہو گیا اور راستہ صاف ہو گیا۔

یہ بھی پڑھیں : اقوام متحدہ نے جنسی تشدد کے الزامات پر اسرائیل کو بلیک لسٹ میں شامل کردیا

ان پابندیوں کے تحت نشانہ بننے والے افراد کے سفر کرنے پر پابندی ہوگی اور ان کے اثاثے منجمد کر دیئے جائیں گے، جبکہ یورپی شہریوں اور کمپنیوں کو بھی ان گروپوں کو فنڈز فراہم کرنے سے روک دیا گیا ہے۔

پابندیوں کا شکار ہونے والوں میں نچالا سیٹلمنٹ موومنٹ کی ڈائریکٹر ڈینیئلا ویس، ریگاویم تنظیم اور اس کے ڈائریکٹر مئیر ڈوئچ، ہاشومیر یوش نامی غیر سرکاری تنظیم اور اس کے صدر اوکھائی سوئیسا، اور امانا کوآپریٹو ایسوسی ایشن شامل ہیں۔

مقبوضہ مغربی کنارے میں 2023 سے اسرائیلی فورسز اور آباد کاروں کے تشدد میں بہت زیادہ اضافہ ہوا ہے، جس پر اب یورپی ممالک اٹلی اور اسپین کی جانب سے اسرائیل کے پولیس وزیر اتامر بن گویر پر بھی پابندیاں لگانے کے لیے دباؤ بڑھ رہا ہے۔