والدین کیلئے خوشخبری؛ حکومت نے اسکولوں کو اجازت دےدی

پنجاب حکومت نے موسم گرما کی تعطیلات کے دوران طلبہ کی تعلیمی سرگرمیوں کو جاری رکھنے کے لیے صوبے بھر کے سرکاری اور نجی تعلیمی اداروں میں سمر کیمپس لگانے کی اجازت دے دی ہے۔

 اس فیصلے کے بعد یکم جون سے 30 جون تک مختلف اسکولوں اور تعلیمی اداروں میں سمر کیمپس کا انعقاد کیا جا سکے گا۔ محکمہ تعلیم کا کہنا ہے کہ اس اقدام کا مقصد طلبہ کی تعلیمی صلاحیتوں میں بہتری لانا اور تعطیلات کے دوران ان کے سیکھنے کے عمل کو برقرار رکھنا ہے۔

جاری کردہ نوٹیفکیشن کے مطابق سمر کیمپس صرف پیر سے جمعرات تک منعقد ہوں گے، جبکہ جمعہ کے روز تعطیل رکھی جائے گی۔ ان کیمپس میں مختلف جماعتوں کے طلبہ شرکت کر سکیں گے اور انہیں نصابی تعلیم کے ساتھ ساتھ ہم نصابی سرگرمیوں میں بھی حصہ لینے کا موقع فراہم کیا جائے گا۔

محکمہ تعلیم نے واضح کیا ہے کہ سمر کیمپس کے دوران طلبہ کی صحت، حفاظت اور آرام کا مکمل خیال رکھا جائے گا۔ شدید گرمی کے پیش نظر اداروں کو ہدایت کی گئی ہے کہ کلاسز کے اوقات مناسب رکھے جائیں اور پینے کے صاف پانی سمیت دیگر بنیادی سہولیات کی فراہمی یقینی بنائی جائے۔