پاکستان کی صنعتی ترقی کیلئے اقوام متحدہ اور عالمی شراکت داروں کا ویانا میں اعلیٰ سطحی اجلاس

صنعتی ترقی کے لیے اقوام متحدہ کے ادارے ‘یونیڈو’ نے ویانا میں پاکستان کی صنعتی ترجیحات اور ترقی کے لیے عالمی شراکت داروں کا ایک اہم اجلاس منعقد کیا۔

ویانا میں ہونے والے اعلیٰ سطحی مذاکراتی اجلاس میں مختلف رکن ممالک، عطیہ دہندگان اور ترقیاتی شراکت داروں نے شرکت کی تاکہ پاکستان کی صنعتی ترقی کے لیے اپنے تعاون کا یقین دلا سکیں۔

اس سے قبل فروری 2026 میں وزیراعظم شہباز شریف کے دورہ آسٹریا کے دوران نائب وزیراعظم اور وزیر خارجہ اسحاق ڈار نے اس شراکت داری پروگرام پر دستخط کیے تھے۔

یونیڈو کے ڈائریکٹر جنرل گرڈ مولر نے اس پروگرام کو پاکستان کی صنعتی ترقی کے لیے ایک بہترین ذریعہ قرار دیتے ہوئے تکنیکی تعاون کی اہم ترجیحات پر روشنی ڈالی۔

یہ بھی پڑھیں : پاکستان آنے والے غیر ملکی سیاحوں کی تعداد میں 820 فیصد کا تاریخی اور ریکارڈ اضافہ

یونیڈو میں پاکستان کے مستقل مندوب سفیر کامران اختر نے کہا کہ یہ شراکت داری پروگرام پاکستان کے قومی ترقیاتی ایجنڈے کے عین مطابق ہے، اور انہوں نے اس کے تحت ماحول دوست توانائی کی منتقلی اور برآمدات پر مبنی صنعتی ترقی کی اہمیت کو اجاگر کیا۔

یہ پروگرام پاکستان میں ویلیو چین کی ترقی، گرین انڈسٹری، پائیدار معدنیات، مہارتوں کی ترقی اور روزگار کے نئے مواقع پیدا کرنے پر توجہ مرکوز کرے گا۔

اجلاس کے دوران چین، یورپی یونین، جاپان، سعودی عرب اور یورپی انویسٹمنٹ بینک نے پاکستان کے اس پروگرام کے لیے اپنی بھرپور حمایت کا اظہار کیا۔

پاکستان اور اس کے عالمی شراکت داروں نے پروگرام کے مؤثر نفاذ کے لیے مضبوط ہم آہنگی پر زور دیا، اور یہ مذاکرات پاکستان کے لیے ترقیاتی امداد کو عملی شکل دینے کے نئے عزم کے ساتھ اختتام پذیر ہوئے۔