سولر صارفین کیلئے بڑی خوشخبری

فیڈرل بورڈ آف ریونیو (ایف بی آر) نے سولر پینلز پر نئے ٹیکس سے متعلق پھیلنے والی خبروں کی تردید کر دی ہے۔

 ادارے کے مطابق سولر توانائی کے شعبے پر نہ کوئی نیا ٹیکس عائد کیا گیا ہے اور نہ ہی اس کی وجہ سے بجلی کے نرخوں میں اضافہ ہوا ہے۔

ایف بی آر حکام کا کہنا ہے کہ سولر سسٹمز نے عوام کو مہنگی بجلی سے بچانے میں اہم کردار ادا کیا ہے۔ اس کے ساتھ ساتھ یہ نظام ملک میں متبادل توانائی کے فروغ میں بھی مددگار ثابت ہو رہا ہے۔

بجٹ 2026-27 کے حوالے سے ہونے والی ٹیکنیکل بریفنگ کے دوران ایف بی آر کے رکن حامد عتیق سرور نے بتایا کہ حکومت نے آئندہ مالی سال کے لیے ٹیکس وصولیوں کا ہدف 15 ہزار 264 ارب روپے مقرر کیا ہے۔ اس ہدف کو حاصل کرنے کے لیے نئے ٹیکس لگانے کے بجائے موجودہ نظام کو بہتر بنانے پر توجہ دی جا رہی ہے۔

انہوں نے کہا کہ حکومت کا فوکس ٹیکس نیٹ کو وسعت دینا اور ٹیکس وصولی کے نظام کو مؤثر بنانا ہے۔ اس کے لیے انفورسمنٹ اقدامات کو بھی مزید سخت اور منظم کیا جا رہا ہے تاکہ محصولات میں اضافہ ممکن ہو سکے۔