لاہور میں الیکٹرک ٹرام کب سے چلے گی؟ اہم خبر آگئی

پنجاب کے وزیر ٹرانسپورٹ بلال اکبر خان کا کہنا ہے کہ نئے مالی سال کے دوران لاہور کی سڑکوں پر الیکٹرک ٹرام چلتی نظر آئے گی۔

وزیر ٹرانسپورٹ نے صحافیوں سے گفتگو کرتے ہوئے کہا کہ الیکٹرک ٹرام کے لیے کنٹریکٹ کا عمل مکمل ہو چکا ہے۔ اس وقت پروکیورمنٹ کا مرحلہ جاری ہے۔ تمام ضروری اقدامات مکمل ہونے کے بعد ٹرام سروس کا باقاعدہ آغاز نئے مالی سال میں کر دیا جائے گا۔

بلال اکبر خان نے کہا کہ ابتدا میں اس منصوبے کے لیے میٹرو سسٹم بنانے کی تجویز دی گئی تھی۔ تاہم بعد میں اس منصوبے میں تبدیلی کرتے ہوئے میٹرو سسٹم کو فی الحال مؤخر کر دیا گیا۔ الیکٹرک ٹرام چلانے کے لیے کسی بھی درخت کو نہیں کاٹا جائے گا۔ حکومت ماحول دوست منصوبوں کو ترجیح دے رہی ہے تاکہ شہریوں کو بہتر سفری سہولت کے ساتھ صاف ماحول بھی فراہم کیا جا سکے۔

انہوں نے مجوزہ روٹ کے بارے میں بتایا کہ الیکٹرک ٹرام سی بی ڈی سے سفر شروع کرے گی۔ اس کے بعد جیل روڈ اور مال روڈ سے گزرتے ہوئے استنبول چوک تک جائے گی۔ اس روٹ سے روزانہ ہزاروں شہری فائدہ اٹھا سکیں گے۔ خاص طور پر دفاتر، تعلیمی اداروں اور کاروباری مراکز جانے والے افراد کے لیے یہ سروس آسان سفر فراہم کرے گی۔