50 ہزار سے 1 لاکھ روپے تک ماہانہ تنخواہ لینے والوں کیلئے بڑی خبر آگئی

وفاقی وزیر اطلاعات عطا تارڑ نے کہا ہے کہ حکومت نے تنخواہ دار طبقے کو بڑا ریلیف دینے کا فیصلہ کیا ہے۔

وفاقی وزیر اطلاعات عطا تارڑ نے پریس کانفرنس کرتے ہوئے کہا کہ 50 ہزار سے 1 لاکھ روپے ماہانہ آمدن رکھنے والے افراد پر صرف 1 فیصد انکم ٹیکس عائد ہوگا۔ جبکہ 50 ہزار روپے تک تنخواہ حاصل کرنے والوں کو مکمل ٹیکس سے استثنیٰ دیا گیا ہے۔

انہوں نے کہا کہ حکومت کی کوشش ہے کہ عام ملازمین پر مالی دباؤ کم کیا جائے۔ بجٹ میں ٹیکس نظام کو زیادہ منصفانہ بنانے کے لیے اقدامات کیے گئے ہیں۔ وزیراعظم شہباز شریف کی ہدایت ہے کہ ایماندار ٹیکس دہندگان پر غیر ضروری بوجھ نہ ڈالا جائے۔

عطا تارڑ نے کہا کہ ٹیکس کلیکشن کے نظام میں بہتری کے لیے نئے ٹریبونلز قائم کیے گئے ہیں۔ حکومت چاہتی ہے کہ ٹیکس وصولی کا عمل شفاف اور تیز ہو۔ اس سے ملکی معیشت کو مستحکم کرنے میں مدد ملے گی۔

وفاقی وزیر نے کہا کہ فیڈرل بورڈ آف ریونیو (ایف بی آر) میں بھی اصلاحات جاری ہیں۔ ماضی میں نظام میں خامیاں اور سفارش کا کلچر موجود تھا، جسے ختم کیا جا رہا ہے۔ اب کسٹمز اور انکم ٹیکس کے محکموں میں تقرریاں صرف میرٹ پر ہوں گی۔

انہوں نے کہا کہ ٹیکس چوری روکنے کے لیے مختلف شعبوں میں سخت اقدامات کیے گئے ہیں۔ خاص طور پر شوگر انڈسٹری میں نگرانی کا نظام بہتر بنایا گیا ہے۔ ہر چینی کی بوری پر بارکوڈ لگایا جا رہا ہے، جس سے پیداوار اور ٹیکس کا ریکارڈ واضح ہو گیا ہے۔ اس اقدام کے نتیجے میں صرف شوگر سیکٹر سے 60 ارب روپے کی اضافی وصولی ہوئی ہے۔

عطا تارڑ نے کہا کہ تمباکو کی صنعت میں بھی غیر قانونی کاروبار کے خلاف کارروائیاں کی گئی ہیں تاکہ قومی خزانے کو نقصان سے بچایا جا سکے۔

آئی ایم ایف پروگرام اور معیشت سے متعلق بات کرتے ہوئے انہوں نے کہا کہ پاکستان کو ڈیفالٹ سے بچانے کے لیے مشکل فیصلے کیے گئے۔ وزیراعظم شہباز شریف کی کوششوں سے عالمی مالیاتی اداروں کے ساتھ معاملات بہتر ہوئے۔