ملائیشیا کے بینک صارفین کے لیے بڑی خوشخبری

یکم جولائی سے ملائیشیا میں میں کسی بھی بینک کے اے ٹی ایم یا اسمارٹ ری سائیکلر مشین (SRM) سے رقم نکلوانے پر لگنے والی 1 رنگٹ انٹربینک ودڈراول فیس مکمل طور پر ختم کر دی جائے گی۔ اس فیصلے کا اطلاق تمام صارفین پر ہوگا۔

بینکنگ اداروں کی جانب سے جاری مشترکہ اعلامیے کے مطابق اس نئے اقدام کے بعد ملک بھر کے ڈیبٹ کارڈ ہولڈرز کو بڑی سہولت ملے گی۔ اب صارفین کسی بھی بینک کی مشین سے بغیر اضافی چارجز کے جتنی بار چاہیں کیش نکال سکیں گے۔ اس سے عوام کو روزمرہ لین دین میں آسانی ہوگی۔

یہ فیصلہ ملائیشیا کی تین بڑی بینکنگ تنظیموں کی مشاورت سے کیا گیا ہے۔ ان میں ایسوسی ایشن آف بینکس آف ملائیشیا، ایسوسی ایشن آف اسلامک بینکنگ اینڈ فنانشل انسٹی ٹیوشنز اور ایسوسی ایشن آف ڈیولپمنٹ فنانس انسٹی ٹیوشنز شامل ہیں۔ یہ پالیسی ملک بھر کے تمام لائسنس یافتہ بینکوں کے اے ٹی ایم اور SRM نیٹ ورک پر لاگو ہوگی۔

بینکنگ ایسوسی ایشنز کے مطابق نقد رقم اب بھی عوام کی روزمرہ زندگی میں ایک اہم ضرورت ہے۔ خاص طور پر ایسے افراد کے لیے جو مکمل طور پر ڈیجیٹل ادائیگیوں پر منتقل نہیں ہوئے۔ اس فیصلے کا مقصد شہریوں کے مالی بوجھ کو کم کرنا اور بینکنگ سروسز کو مزید آسان بنانا ہے۔

اعلامیے میں کہا گیا ہے کہ یہ قدم کسٹمر فرینڈلی بینکنگ نظام کی طرف ایک اہم پیش رفت ہے۔ اس کے ساتھ ساتھ ملائیشیا میں ڈیجیٹل اور کیش لیس ادائیگیوں کے نظام کو بھی فروغ دیا جا رہا ہے۔