پیٹرول و ڈیزل کی قیمتوں میں تاریخی کمی سے متعلق وزیرپیٹرولیم نے خوشخبری سنادی

وفاقی وزیر پیٹرولیم علی پرویز ملک کا کہنا ہے کہ ملک میں پیٹرولیم مصنوعات کی قیمتوں میں کمی کا امکان موجود ہے اور جلد عوام کے لیے اچھی خبر سامنے آسکتی ہے۔

وفاقی وزیر پیٹرولیم علی پرویز ملک نے نجی ٹی وی چینل کو دیے گئے انٹرویو میں کہا کہ حالیہ عرصے میں عالمی صورتحال، خاص طور پر امریکا اور ایران کے درمیان کشیدگی کی وجہ سے تیل کی قیمتوں میں اتار چڑھاؤ دیکھا گیا، جس کا اثر پاکستان پر بھی پڑا۔ قیمتوں میں اضافے سے عام شہریوں کے گھریلو بجٹ پر بوجھ بڑھا ہے۔

انہوں نے کہا کہ حکومت کی کوشش ہے کہ عالمی منڈی میں قیمتیں کم ہونے کا فائدہ براہ راست عوام تک پہنچایا جائے۔ جہاں تک ممکن ہو عوام کو ریلیف دیا جائے اور پیٹرولیم مصنوعات کی قیمتوں میں کمی کی جائے۔

علی پرویز ملک کے مطابق عالمی منڈی میں خام تیل کی صورتحال بہتر ہو رہی ہے۔ ایران سے تیل کی دستیابی کے امکانات کے باعث قیمتوں میں کمی کا رجحان دیکھا جا رہا ہے۔ اگر یہ صورتحال برقرار رہی تو پاکستان میں بھی پیٹرول کی قیمتوں میں کمی ممکن ہو سکتی ہے۔

انہوں نے کہا کہ آئندہ ایک ہفتے کے لیے پیٹرولیم مصنوعات کی نئی قیمتوں کا اعلان جمعہ کی رات کیا جائے گا۔ اس اعلان کا انتظار ملک بھر میں کیا جا رہا ہے کیونکہ اس سے براہ راست مہنگائی اور ٹرانسپورٹ کے اخراجات متاثر ہوتے ہیں۔