اپنے واحد طاقتور اتحادی پر حملے مت کریں، امریکی نائب صدر کی اسرائیل کو سخت وارننگ

امریکی نائب صدر نے ایران معاہدے پر تنقید کرنے والے اسرائیلی وزراء کو سخت الفاظ میں خبردار کرتے ہوئے کہا ہے کہ وہ اپنے واحد طاقتور اتحادی پر حملے کرنے سے گریز کریں۔

امریکی نائب صدر جے ڈی وینس نے اسرائیلی کابینہ کے ان ارکان کو سخت جواب دیا ہے، جنہوں نے امریکہ ایران معاہدے پر صدر ڈونلڈ ٹرمپ کو نشانہ بنایا تھا۔

جے ڈی وینس کا کہنا تھا کہ اگر وہ اسرائیلی حکومت کی کابینہ میں ہوتے تو دنیا میں اپنے واحد طاقتور ترین اتحادی پر حملے نہ کر رہے ہوتے۔

یہ بھی پڑھیں : اٹلی اور فرانس کے بعد آسٹریلیا کا بھی اسرائیل کے خلاف تحقیقات شروع کرنے کا اعلان

اطلاعات کے مطابق، صدر ٹرمپ کی اسرائیلی وزیراعظم کے ساتھ بھی تلخ گفتگو ہوئی تھی، خاص طور پر جب انہیں یہ خدشہ تھا کہ لبنان میں اسرائیل کے فوجی آپریشنز کی وجہ سے اس مفاہمت کی یادداشت کو نقصان پہنچ سکتا ہے۔

امریکہ میں موجود طاقتور اسرائیل لابی نے بھی ٹرمپ انتظامیہ پر تنقید کی تھی کیونکہ اس معاہدے میں لبنان کو شامل کیا گیا ہے۔

صدر ٹرمپ نے پہلے اشارہ دیا تھا کہ لبنان ایک الگ معاملہ ہے، لیکن اب یادداشت میں واضح ہے کہ اسرائیل کو لبنان میں اپنے فوجی آپریشنز روکنا ہوں گے۔

اس صورتحال نے کانگریس کے اسرائیل نواز ارکان میں سوالات کھڑے کر دیئے ہیں، تاہم ٹرمپ انتظامیہ اس دباؤ کا مقابلہ کر رہی ہے۔