معروف پاکستانی گلوکار طارق طافو انتقال کر گئے

پاکستان کے معروف لوک اور اسٹیج گلوکار طارق طافو انتقال کر گئے۔

خاندانی ذرائع کے مطابق طارق طافو کی طبیعت اچانک خراب ہوئی، جس کے بعد انہیں فوری طور پر اسپتال منتقل کیا گیا۔ ڈاکٹروں نے انہیں بچانے کی کوشش کی، تاہم وہ جانبر نہ ہو سکے اور اپنے چاہنے والوں کو سوگوار چھوڑ گئے۔

طارق طافو نے کئی دہائیوں تک پنجابی لوک موسیقی کی خدمت کی۔ ان کی منفرد آواز اور گائیکی کا انداز انہیں دوسرے فنکاروں سے الگ پہچان دیتا تھا۔ انہوں نے بے شمار مقبول گیت گائے، جنہیں آج بھی موسیقی کے شائقین بڑی دلچسپی سے سنتے ہیں۔ ان کا مشہور گیت "لاہور لاہور اے” آج بھی ان کی شناخت سمجھا جاتا ہے۔

مرحوم نامور موسیقار طافو خان کے صاحبزادے تھے۔ انہوں نے اپنے والد کی فنی روایت کو آگے بڑھایا اور لوک موسیقی کو نئی نسل تک پہنچانے میں اہم کردار ادا کیا۔ ان کی فنی خدمات کو ہمیشہ یاد رکھا جائے گا۔

طارق طافو کے انتقال پر فنکار برادری، سیاسی و سماجی شخصیات اور مداحوں نے گہرے دکھ کا اظہار کیا ہے۔