معروف ماڈل پریسلے گیربر 27 سال کی عمر میں انتقال کرگئے

معروف ماڈل اور اداکارہ کایا گیربر کے بھائی پریسلے گیربر 27 سال کی عمر میں انتقال کرگئے۔

امریکی میڈیا رپورٹس کے مطابق پریسلے گیربر 20 ستمبر کو انتقال کرگئے۔ ان کی موت کی تصدیق خاندان کے نمائندے نے بھی کردی ہے۔

لاس اینجلس کاؤنٹی میڈیکل ایگزامنر کے ریکارڈ کے مطابق پریسلے گیربر کی موت بحالی مرکز میں ہوئی۔ تاہم ان کی موت کی حتمی وجہ تاحال سامنے نہیں آئی۔ پوسٹ مارٹم کا عمل جاری ہے، جس کے بعد مزید معلومات سامنے آنے کی توقع ہے۔

پریسلے گیربر معروف سپر ماڈل سنڈی کرافورڈ اور کاروباری شخصیت رینڈی گیربر کے بیٹے تھے۔ وہ ماڈل کایا گیربر کے بڑے بھائی تھے۔ پریسلے نے بھی اپنی والدہ اور بہن کی طرح فیشن کی دنیا میں قدم رکھا اور مختلف معروف برانڈز کے ساتھ کام کیا۔

پریسلے گیربر نے کم عمری میں ماڈلنگ شروع کی تھی۔ وہ 15 سال کی عمر میں آئی ایم جی ماڈلز کے ساتھ منسلک ہوئے۔ 2016 میں انہوں نے موسکینو کے فیشن شو سے رن وے پر اپنے کیریئر کا آغاز کیا۔ بعد میں انہوں نے کیلون کلائن، ڈولچے اینڈ گبانا اور دیگر معروف برانڈز کے لیے ماڈلنگ کی۔

2018 میں پریسلے گیربر اپنی والدہ سنڈی کرافورڈ کے ساتھ پیپسی کے ایک اشتہار میں بھی نظر آئے۔ اس اشتہار میں سنڈی کرافورڈ کے مشہور پرانے اشتہار کو نئے انداز میں پیش کیا گیا تھا۔