حج 2027 کے خواہشمند افراد کیلئے رجسٹریشن اور ادائیگی کا مکمل ڈیجیٹل نظام متعارف

حج 2027 کی تیاری کرنے والے شہریوں کے لیے وزارت مذہبی امور نے اہم سہولت متعارف کروا دی ہے۔

حکومت نے آئندہ حج کے تمام مراحل کو جدید ٹیکنالوجی سے ہم آہنگ کرتے ہوئے ڈیجیٹل حج نظام فعال کر دیا ہے۔ اس نئے نظام کے تحت رجسٹریشن، درخواست کی جانچ، ادائیگی اور درخواست کی صورتحال جاننے سمیت بیشتر مراحل آن لائن مکمل کیے جا سکیں گے۔

وزارت مذہبی امور کے مطابق نیشنل آئی ٹی بورڈ کے تعاون سے تیار کیا گیا یہ نظام حج درخواست گزاروں کے لیے آسانی پیدا کرے گا۔ آن لائن حج پورٹل پر رجسٹریشن کا عمل جاری ہے اور اب تک ڈیڑھ لاکھ سے زیادہ افراد اپنی رجسٹریشن مکمل کر چکے ہیں، جو اس نظام پر عوام کے اعتماد کا اظہار ہے۔

حکام کا کہنا ہے کہ وزیراعظم کی ہدایت پر حج واجبات کی آن لائن ادائیگی کا نظام بھی مکمل طور پر تیار کر لیا گیا ہے۔ اس سہولت کے بعد درخواست گزاروں کو بینکوں کے چکر لگانے کی ضرورت نہیں ہوگی۔ وہ گھر بیٹھے ون لنک کے ذریعے اپنی حج فیس آسانی سے جمع کروا سکیں گے، جس سے وقت اور اخراجات دونوں کی بچت ہوگی۔

وزارت مذہبی امور کے مطابق حج 2027 کے لیے رجسٹریشن کا پورا عمل چند آسان مراحل میں مکمل کیا جا سکے گا۔ درخواست گزار آن لائن پورٹل پر اپنی درخواست جمع کروانے کے بعد کسی بھی وقت اس کا اسٹیٹس بھی دیکھ سکیں گے۔ اس سے درخواست کے مراحل کی نگرانی کرنا پہلے کے مقابلے میں زیادہ آسان ہو جائے گا۔

اس نئے نظام سے بیرون ملک مقیم پاکستانی بھی بھرپور فائدہ اٹھا سکیں گے۔ سمندر پار پاکستانی دنیا کے کسی بھی ملک سے آن لائن رجسٹریشن کر سکیں گے اور حج واجبات بھی ڈیجیٹل طریقے سے ادا کر سکیں گے۔ اس سے انہیں پاکستان آکر صرف رجسٹریشن یا ادائیگی کے مراحل مکمل کرنے کی ضرورت نہیں رہے گی۔