ڈاکٹر یاسمین راشد کے انتقال کی افواہیں بے بنیاد، وکیل رانا مدثر عمر نے حقیقت واضح کر دی

لاہور: پاکستان تحریک انصاف کی سینئر رہنما اور سابق صوبائی وزیر صحت پنجاب ڈاکٹر یاسمین راشد کے انتقال سے متعلق سوشل میڈیا پر گردش کرنے والی خبروں کی سختی سے تردید کر دی گئی ہے۔

ان کے قریبی ذرائع اور وکیل نے واضح کیا ہے کہ ڈاکٹر یاسمین راشد حیات ہیں اور ان کی وفات سے متعلق تمام دعوے بے بنیاد اور گمراہ کن ہیں۔

جاری کردہ وضاحت میں کہا گیا ہے کہ ڈاکٹر یاسمین راشد کو اگرچہ صحت کے بعض مسائل کا سامنا ہے، تاہم وہ حوصلے اور ثابت قدمی کے ساتھ اپنی بیماری کا مقابلہ کر رہی ہیں۔

ڈاکٹر یاسمین راشد کی وحیت پر وکیل رانا مدثر عمر کا ویڈیو بیان

ڈاکٹر یاسمین راشد نے کوئی وصیت نہیں کی۔ڈاکٹر یاسمین راشد کا کینسر کا علاج معالجہ چل رہا ہےقوم نے مجھے دعاؤں میں یاد رکھا اس پر پوری قوم کا شکریہ ادا کرتی کینسر کی ایک سرجری ڈاکٹرز نے بتائی ہے pic.twitter.com/r3ahUGRrrW

— Arshad Ali (@ArshadAliUmar) June 29, 2026

بیان میں عوام سے اپیل کی گئی کہ غیر مصدقہ اطلاعات پر یقین نہ کریں اور سوشل میڈیا پر افواہیں پھیلانے سے گریز کریں۔

ڈاکٹر یاسمین راشد کے وکیل رانا مدثر عمر نے بھی ایک ویڈیو بیان میں ان کی صحت سے متعلق وضاحت کرتے ہوئے کہا کہ ڈاکٹر یاسمین راشد نے کسی قسم کی وصیت نہیں کی۔

انہوں نے بتایا کہ ان کا کینسر کا علاج جاری ہے، جبکہ ڈاکٹروں کی ہدایت کے مطابق ان کی ایک سرجری ہو چکی ہے یا علاج کے سلسلے میں تجویز کی گئی ہے۔

رانا مدثر عمر نے کہا کہ ڈاکٹر یاسمین راشد نے اپنی صحت کے لیے دعائیں کرنے والے تمام افراد کا شکریہ ادا کیا ہے اور قوم کی محبت و حمایت پر اظہارِ تشکر کیا ہے۔

دوسری جانب پاکستان تحریک انصاف کے رہنما قاسم سوری نے بھی اپنے بیان میں کہا کہ ڈاکٹر یاسمین راشد کینسر کے علاج کے مراحل سے گزر رہی ہیں اور اس وقت 76 برس کی عمر میں مختلف مشکلات کا سامنا کر رہی ہیں۔ وہ تمام تر حالات کے باوجود ثابت قدم ہیں۔

تمام متعلقہ بیانات میں اس بات کی تصدیق کی گئی ہے کہ ڈاکٹر یاسمین راشد زندہ ہیں، جبکہ ان کے انتقال سے متعلق سوشل میڈیا پر زیر گردش خبریں غلط، بے بنیاد اور حقیقت کے منافی ہیں۔