ملک بھر کے پاسپورٹ دفاتر میں نقد ادائیگی کا نظام ختم

 وفاقی وزیر داخلہ محسن نقوی نے اعلان کیا ہے کہ ملک بھر کے تمام پاسپورٹ دفاتر میں نقد رقم جمع کروانے کا طریقہ ختم کر دیا گیا ہے۔

وفاقی وزیر داخلہ نے سماجی رابطے کی ویب سائٹ ایکس پر اپنے پیغام میں بتایا کہ پاسپورٹ دفاتر میں کیش لیس نظام مکمل طور پر نافذ کر دیا گیا ہے۔ اب درخواست گزار مختلف ڈیجیٹل ادائیگی کے ذرائع استعمال کرتے ہوئے اپنی فیس آسانی سے جمع کروا سکیں گے۔

محسن نقوی نے کہا کہ وزیراعظم شہباز شریف کی ہدایات کے مطابق پاسپورٹ سروسز کو جدید خطوط پر استوار کرنے کے لیے اصلاحاتی اقدامات مکمل کیے گئے ہیں۔ ڈیجیٹل ادائیگی کے نظام سے نہ صرف کام کی رفتار میں بہتری آئے گی بلکہ مالی معاملات میں شفافیت بھی بڑھے گی۔ اس کے ساتھ پاسپورٹ کے اجرا کے عمل کو مزید مؤثر اور منظم بنانے میں بھی مدد ملے گی۔

انہوں نے کہا کہ جدید ٹیکنالوجی کے استعمال سے شہریوں کو بہتر سرکاری خدمات فراہم کرنا حکومت کی ترجیح ہے۔ ڈیجیٹل نظام کے ذریعے فیس کی ادائیگی کا ریکارڈ محفوظ رہے گا، جس سے غلطیوں اور غیر ضروری تاخیر کے امکانات بھی کم ہوں گے۔

وفاقی وزیر داخلہ نے اس موقع پر پاسپورٹ اینڈ امیگریشن حکام اور متعلقہ ٹیم کو اس منصوبے کے کامیاب نفاذ پر مبارکباد بھی دی۔ انہوں نے امید ظاہر کی کہ نئے نظام سے عوام کو بہتر سہولت ملے گی۔