نیپرا نے سینٹرل پاور پرچیزنگ ایجنسی کے ملازمین کی تنخواہوں میں اضافے اور بونسز کی منظوری دیدی

نیشنل الیکٹرک پاور ریگولیٹری اتھارٹی (نیپرا) نے سینٹرل پاور پرچیزنگ ایجنسی کے ملازمین کے لیے تنخواہوں میں اضافے، کارکردگی انکریمنٹ اور بونس کی منظوری دے دی ہے۔

 یہ فیصلہ مالی سال 2025-26 کے مارکیٹ آپریشن فیس سے متعلق جاری کیے گئے حکم نامے میں کیا گیا۔ اس فیصلے کے بعد ملازمین کی مجموعی تنخواہوں میں 10.49 فیصد تک اضافہ ہوگا۔

نیپرا کے فیصلے کے مطابق ملازمین کی بنیادی تنخواہوں میں مہنگائی کے تناسب سے 4.49 فیصد اضافہ کیا گیا ہے۔ اس کے علاوہ کارکردگی کی بنیاد پر مزید 6 فیصد انکریمنٹ بھی منظور کیا گیا ہے۔ اس طرح دونوں اضافوں کو ملا کر مجموعی تنخواہ میں 10.49 فیصد اضافہ ہوگا۔

ریگولیٹری اتھارٹی نے ملازمین کی تنخواہوں کی ادائیگی کے لیے ایک ارب 58 کروڑ روپے کے بجٹ کی منظوری دی ہے۔ اسی طرح ملازمین کو مختلف مراعات دینے کے لیے 24 کروڑ 90 لاکھ روپے مختص کرنے کی اجازت بھی دی گئی ہے۔ اس فیصلے سے ادارے کے ملازمین کو مالی فائدہ حاصل ہوگا۔

بونس کے معاملے میں نیپرا نے کمپنی کی مکمل درخواست منظور نہیں کی۔ سی پی پی اے جی نے ملازمین کے لیے 19 کروڑ 90 لاکھ روپے بونس کی منظوری مانگی تھی، تاہم اتھارٹی نے اس رقم کو کم کرتے ہوئے صرف ایک بنیادی تنخواہ کے برابر بونس کی اجازت دی۔ اس مقصد کے لیے 5 کروڑ 56 لاکھ روپے منظور کیے گئے ہیں۔

نیپرا نے نئی بھرتیوں کے حوالے سے بھی محتاط رویہ اختیار کیا۔ ادارے میں پہلے سے بھرتی کیے گئے 26 ملازمین کے اخراجات کے لیے 10 کروڑ 97 لاکھ روپے کی منظوری دی گئی، جبکہ آئندہ کسی بھی نئی بھرتی کو الگ منظوری سے مشروط کر دیا گیا ہے۔ اس کا مقصد غیر ضروری اخراجات پر قابو رکھنا بتایا گیا ہے۔

ادارے کی جانب سے اسٹاف ٹریننگ کے لیے 3 کروڑ 20 لاکھ روپے مانگے گئے تھے، لیکن نیپرا نے صرف 85 لاکھ روپے کی منظوری دی۔ اسی طرح ہیڈ ہنٹنگ فرمز، کنسلٹنٹس اور معاوضہ سروے سے متعلق تمام درخواستیں مسترد کر دی گئیں تاکہ اضافی مالی بوجھ سے بچا جا سکے۔

نیپرا نے انتظامی اخراجات میں بھی نمایاں کمی کی ہے۔ کمپنی نے 31 کروڑ 60 لاکھ روپے کے انتظامی اخراجات تجویز کیے تھے، لیکن انہیں کم کرکے 27 کروڑ 11 لاکھ روپے تک محدود کر دیا گیا۔ اس میں کمیونیکیشن، آڈٹ فیس، انشورنس اور دیگر دفتری اخراجات شامل ہیں۔

اسی طرح آئی ٹی سروسز، گاڑیوں کی مرمت اور دیگر تکنیکی اخراجات کے لیے مانگی گئی 24 کروڑ 10 لاکھ روپے کی رقم بھی کم کر کے 13 کروڑ 70 لاکھ روپے منظور کی گئی ہے۔ نیپرا کا کہنا ہے کہ مالی نظم و ضبط برقرار رکھنا ضروری ہے اور غیر ضروری اخراجات کی اجازت نہیں دی جا سکتی۔