لاہور؛ جان لیوا حادثے پر ڈرائیونگ لائسنس معطل کرنے کا فیصلہ

لاہور میں ٹریفک حادثات کی روک تھام اور شہریوں کی جان و مال کے تحفظ کے لیے چیف ٹریفک آفیسر (سی ٹی او) لاہور نے اہم اقدامات کا اعلان کر دیا ہے۔

 نئی ہدایات کے تحت اب جان لیوا حادثے میں ملوث ڈرائیور کا ڈرائیونگ لائسنس فوری طور پر معطل کیا جا سکے گا۔ اس کے ساتھ غیر ذمہ دارانہ اور خطرناک انداز میں گاڑی چلانے والوں کے خلاف بھی سخت کارروائی کی جائے گی تاکہ سڑکوں پر ٹریفک نظم و ضبط کو بہتر بنایا جا سکے۔

حکام کے مطابق صرف جان لیوا حادثات ہی نہیں بلکہ لاپرواہی، تیز رفتاری اور ٹریفک قوانین کی سنگین خلاف ورزی کرنے والے ڈرائیور بھی کارروائی کی زد میں آئیں گے۔ ایسے افراد کے ڈرائیونگ لائسنس کم از کم چھ ماہ سے لے کر تین سال تک کے لیے معطل کیے جا سکتے ہیں۔ اس اقدام کا مقصد خطرناک ڈرائیونگ کی حوصلہ شکنی اور حادثات میں کمی لانا ہے۔

سی ٹی او لاہور نے واضح کیا ہے کہ اگر کسی شخص کا لائسنس معطل ہونے کے باوجود وہ گاڑی چلاتا پایا گیا تو اس کے خلاف قانونی مقدمہ درج کیا جائے گا۔ معطل شدہ لائسنس کے ساتھ ڈرائیونگ کرنا قانون کی خلاف ورزی تصور ہوگی اور ایسے افراد کو مزید قانونی نتائج کا سامنا کرنا پڑے گا۔

اعلامیے میں بتایا گیا ہے کہ جن حادثات میں کسی شہری کی جان ضائع ہو جائے گی، ان مقدمات میں ڈرائیونگ لائسنس کی بحالی صرف عدالت کے حکم پر ممکن ہوگی۔ اس طرح سنگین حادثات میں ملوث افراد کو فوری طور پر دوبارہ گاڑی چلانے کی اجازت نہیں ملے گی۔

ٹریفک پولیس کا کہنا ہے کہ شہر میں حادثات کی بڑی وجوہات میں تیز رفتاری، غیر ذمہ دارانہ ڈرائیونگ اور ٹریفک قوانین کی خلاف ورزی شامل ہیں۔ اسی لیے اب زیرو ٹالرنس پالیسی پر عمل کیا جائے گا۔ ہر ڈرائیور کو قوانین کی پابندی کرنا ہوگی اور خلاف ورزی کی صورت میں بلاامتیاز کارروائی کی جائے گی۔