نادرا نے فیملی ریکارڈ کی درستگی کو یقینی بنانے کیلئے ڈیجیٹل سہولت متعارف کروا دی

نیشنل ڈیٹا بیس اینڈ رجسٹریشن اتھارٹی (نادرا) نے شہریوں کے لیے فیملی ریکارڈ کی درستگی کو یقینی بنانے کے لیے ایک اہم ڈیجیٹل سہولت متعارف کروا دی ہے۔

اب اگر کسی شہری کے خاندانی ریکارڈ میں غلطی سے کسی غیر متعلقہ یا نامعلوم شخص کا اندراج موجود ہو تو وہ گھر بیٹھے آسانی سے اس کی شکایت درج کر سکتا ہے۔ اس اقدام کا مقصد شہریوں کے ریکارڈ کو محفوظ، درست اور شفاف بنانا ہے۔

نادرا کے مطابق بعض اوقات تکنیکی خرابی، غلط اندراج یا دیگر وجوہات کی بنا پر فیملی ٹری میں ایسے افراد شامل ہو جاتے ہیں جن کا اصل خاندان سے کوئی تعلق نہیں ہوتا۔ ایسی صورت میں شہریوں کو دفاتر کے چکر لگانے کے بجائے نادرا کی ڈیجیٹل سروس استعمال کرنے کی ہدایت کی گئی ہے تاکہ مسئلہ جلد حل کیا جا سکے۔

اس مقصد کے لیے نادرا نے اپنی پاک آئی ڈی (Pak ID) موبائل ایپ میں "رپورٹ انٹرودر” نامی نیا فیچر شامل کیا ہے۔ اس فیچر کے ذریعے صارف کسی بھی مشکوک یا غیر متعلقہ فرد کے بارے میں براہِ راست نادرا کو اطلاع دے سکتا ہے۔ اس کے بعد ادارہ موصول ہونے والی شکایت کی مکمل جانچ کرتا ہے اور اگر ریکارڈ میں غلطی ثابت ہو جائے تو ضروری کارروائی کرتے ہوئے اندراج کو درست کیا جاتا ہے۔

شکایت درج کروانے کا طریقہ بھی انتہائی آسان رکھا گیا ہے۔ سب سے پہلے صارف پاک آئی ڈی ایپ میں لاگ ان کرے۔ اس کے بعد فیملی کمپوزیشن کے سیکشن میں جا کر اپنے خاندان کے تمام افراد کی تفصیلات دیکھے۔ اگر فہرست میں کوئی نام ایسا ہو جو خاندان سے تعلق نہیں رکھتا تو اس فرد کی پروفائل کھول کر نیچے موجود "رپورٹ انٹرودر” کا آپشن منتخب کیا جائے۔ درخواست جمع ہونے کے بعد نادرا کا متعلقہ نظام اس معاملے کی جانچ شروع کر دیتا ہے۔

نادرا حکام کا کہنا ہے کہ جدید ڈیجیٹل سہولیات متعارف کروانے کا مقصد شہریوں کو تیز، محفوظ اور آسان خدمات فراہم کرنا ہے۔ اس نئے نظام کے ذریعے لوگ اپنے خاندانی ریکارڈ پر خود بھی نظر رکھ سکتے ہیں اور کسی بھی غلط اندراج کی فوری نشاندہی کر سکتے ہیں۔ اس سے نہ صرف وقت کی بچت ہوگی بلکہ ریکارڈ کی درستگی بھی بہتر انداز میں برقرار رکھی جا سکے گی۔