امریکی فوج کے ایران پر فضائی حملے، بندر عباس اور قشم میں درجنوں دھماکے، کئی افراد زخمی

امریکی فوج نے آبنائے ہرمز میں تجارتی جہازوں پر حملوں کے جواب میں ایران کے شمالی اور جنوبی علاقوں میں حملوں کا نیا سلسلہ شروع کر دیا۔

امریکی فوج کی سینٹرل کمانڈ نے ایران کے متعدد فوجی اور دفاعی اہداف پر طاقتور فضائی حملے کیے ہیں۔ امریکی حکام کے مطابق یہ کارروائی آبنائے ہرمز کی عالمی آبی گزرگاہ میں معصوم شہریوں پر مشتمل 3 تجارتی بحری جہازوں پر ہونے والے ایرانی حملوں کے جواب میں کی گئی ہے۔

امریکی فوج کا کہنا ہے کہ ایران کی جانب سے بحری جہازوں کو نشانہ بنانا بلاجواز، انتہائی خطرناک اور دونوں ممالک کے درمیان قائم عبوری جنگ بندی کے معاہدے کی کھلی خلاف ورزی تھی۔

ان حملوں کے بعد ایران کے ساحلی اور بندرگاہی شہروں میں زوردار دھماکوں کی آوازیں سنی گئی ہیں۔ امریکی حکام نے تصدیق کی ہے کہ حملوں میں ایران کے فضائی دفاعی نظام، ساحلی نگرانی کے نظام، زمین سے فضا میں مار کرنے والے میزائلوں، جہاز شکن کروز میزائلوں اور ڈرون لانچنگ سائٹس کو نشانہ بنایا گیا ہے۔

یہ بھی پڑھیں : آبنائے ہرمز میں وارننگ کو نظر انداز کرنے والے آئل ٹینکر کو نشانہ بنایا، ایران

مقامی حکام اور ایران کے سرکاری ٹی وی کے مطابق جنوبی ایران کے مختلف مقامات پر درجنوں دھماکے ہوئے ہیں۔ جزیرہ قشم پر کم از کم 6 دھماکے سنے گئے، جہاں ایک تجارتی گھاٹ کو نشانہ بنایا گیا۔

آبنائے ہرمز پر نظر رکھنے والے انتہائی اہم علاقے سیریک میں 7 سے 9 دھماکے رپورٹ ہوئے ہیں، جہاں تجارتی اور ماہی گیری کے گھاٹ پر حملہ کیا گیا۔

ان حملوں کے نتیجے میں سیریک بندرگاہ پر کئی افراد زخمی ہوئے، جنہیں میناب اسپتال منتقل کر دیا گیا ہے۔ ایران کے سب سے بڑے بندرگاہی شہر بندر عباس میں بھی 10 دھماکے سنے گئے، جہاں مواصلاتی ٹاورز اور ماہی گیری کے گھاٹوں کو نشانہ بنایا گیا۔

ایران کے سرکاری میڈیا کا دعویٰ ہے کہ امریکی حملوں میں زیادہ تر سویلین علاقوں کو نشانہ بنایا گیا ہے۔ ایران کی وزارتِ خارجہ کے ترجمان نے کہا ہے کہ معاہدے کے تحت آبنائے ہرمز پر ایران کا مکمل کنٹرول ہے اور وہاں سے گزرنے والے کسی بھی جہاز کو ایرانی فریق کے ساتھ ہم آہنگی کرنی چاہیے تھی۔

اس نئی کشیدگی نے 28 فروری سے جاری جنگ کے مستقل خاتمے اور تہران کے جوہری پروگرام پر ہونے والے مذاکرات کو خطرے میں ڈال دیا ہے۔